जळगाव (प्रतिनिधी) गिरीश महाजन चावट आहे. त्यांच्या एका वक्तव्याची क्लिप मला मिळाली आहे, असे वादग्रस्त वक्तव्य राष्ट्रवादीचे ज्येष्ठ नेते आमदार एकनाथराव खडसे यांनी केली असल्याचा व्हिडीओ व्हायरल होत आहे. याबाबतचे वृत्त ‘टीव्ही9 मराठी’ने दिले आहे.
‘टीव्ही9 मराठी’ने आपल्या वृत्तात म्हटले आहे की, बघा गिरीश महाजन चावट आहे. त्यांच्या एका वक्तव्याची क्लिप मला मिळाली आहे, असं म्हणताना एकनाथ खडसे या व्हिडीओत दिसतात. काही लोकांशी चर्चा करताना त्यांनी हे विधान केल्याचं दिसत आहे. गिरीश महाजन यांनी बंजारा समाजाचे दैवत सेवालाल महाराज यांच्या जयंती प्रसंगी आक्षेपार्ह विधान केल्याचा व्हिडिओ आपल्याकडे असल्याचा दावा करताना खडसे या व्हिडीओत दिसत आहेत. दरम्यान, ‘टीव्ही9 मराठी’ने या व्हिडीओच्या सत्यतेबद्दल कोणतीही पुष्टी करत नाहीये.
दुसरीकडे जामनेर येथील राष्ट्रवादी काँग्रेसच्या मेळाव्यात एकनाथराव खडसे यांनी बंजारा समाज बांधव हे दोन किलो मटण आणि एका दारूच्या बाटलीवर मतदान करतात, असं वक्तव्य केल होतं. त्यामुळे खडसे यांचा राज्यभरात निषेध व्यक्त करण्यात येत असून ठिकठिकाणी निवेदन देण्यात येऊन त्यांच्यावर गुन्हा दाखल करण्याची मागणी केली जात आहे. आज या मोर्चापूर्वीच बंजारा समाजाच्या कार्यकर्त्यांनी एकनाथ खडसेंच्या प्रतिमेला चपला तसेच जोडे मारून संताप व्यक्त केला. तसेच खडसेंची प्रतिमा असलेल्या फलकाला लाथा मारून संतप्त भावना व्यक्त केल्यात.
