नाशिक (वृत्तसंस्था) मधल्या सुटीत डबा खाण्यासाठी सर्व विद्यार्थिनी एकत्र बसल्या असताना अचानक प्रकृती खराब झाल्यानंतर चिमुकलीचा मृत्यू झाल्याची हृदयद्रावक घटना दि. २० बुधवार रोजी घडली. पूर्वा विलास गवते, असे मयत विद्यार्थिनीचे नाव आहे.
या संदर्भात अधिक असे की, त्र्यंबकेश्वर तालुक्यातील अंबोली येथील जिल्हा परिषद शाळेत पूर्वा गवते इयत्ता पहिलीच्या वर्गात शिकत होती. ती बुधवारी सकाळी शाळेत गेली होती. दुपारी १२:३० च्या सुमारास मधल्या सुटीत डबा खाण्यासाठी सर्व विद्यार्थिनी एकत्र बसल्या असताना, तिच्या पोटात दुखू लागले. तिला उलटीही झाली. काही वेळातच ती बेशुद्धही पडली.
यानंतर तिला तात्काळ खासगी वाहनाने त्र्यंबकच्या उपजिल्हा रुग्णालयात दाखल करण्यात आले. तिथून जिल्हा रुग्णालयात हलविले असता वैद्यकीय अधिकाऱ्यांनी पूर्वाला मृत घोषित केले. याप्रकरणात मुख्यकार्यकारी अधिकारी आशिमा मित्तल यांनी चौकशीचे आदेश दिले होते. त्यानुसार शुक्रवारी चौकशी झाली असून अहवाल सादर करण्यात आला. तर पूर्वाच्या अकाली ‘एक्झिट’ने सर्वच हळहळले. याबाबतचे वृत्त आज स्थानिक माध्यमांनी दिले आहे.
