नवी दिल्ली (वृत्तसंस्था) झारखंडमध्ये कथित मनी लाँड्रिंग प्रकरणात ED ने IAS अधिकारी पूजा सिंघल यांना अटक केली आहे. यापूर्वी ईडीने तिचे पती सीए सुमन कुमार यांना अटक केली होती.
ईडीने नुकतेच मनरेगा प्रकरणात झारखंडसह अनेक राज्यांमध्ये छापे टाकले होते. याप्रकरणी झारखंडच्या वरिष्ठ आयएएस पूजा सिंघल यांच्या घरावरही छापा टाकण्यात आला. पूजा सिंघल या सध्या झारखंड सरकारमध्ये खाण सचिव म्हणून कार्यरत आहेत. हे प्रकरण झारखंडमध्ये 2020 मध्ये दाखल झालेल्या 16 प्रकरणांशी संबंधित आहे, ईडीने नंतर मनी लाँड्रिंगचा गुन्हा नोंदवला आहे. या प्रकरणी कनिष्ठ अभियंता राम विनोद प्रसाद सिन्हा यांना अटक करण्यात आली होती.
सरकारी निधीतून 18 कोटींचा घोटाळा
राम विनोद प्रसाद सिन्हा यांनी झारखंडमधील खुंटी जिल्ह्यात नियुक्ती असताना मनरेगाच्या सरकारी निधीतून 18 कोटी रुपयांची फसवणूक केल्याचा आरोप आहे. त्याचवेळी पूजा सिंघल याही तिथं जिल्हा दंडाधिकारी होत्या. झारखंड पोलिसांनी या प्रकरणी 16 एफआयआर नोंदवून तपास सुरू केला आणि राम विनोद प्रसाद सिन्हा याला अटक केली. झारखंड पोलिसांनी या प्रकरणी आरोपपत्रही दाखल केलं आहे. या नोंदणीकृत प्रकरणांच्या आधारे, ईडीने मनी लाँड्रिंगचा गुन्हा दाखल केला होता, ज्यामध्ये ईडीने राम विनोद प्रसाद सिन्हा यांची सुमारे 4.25 कोटींची मालमत्ता देखील जप्त केली होती.
