जळगाव (प्रतिनिधी) – मित्र व शिक्षकांसमोर प्राचार्यांनी मारहाण केल्यामुळे नैराश्यात गेलेल्या विद्यार्थ्याने गळफास घेऊन आत्महत्या केल्याची धक्कादायक घटना समोर आली आहे. श्याम प्रभाकर पाटील (वय २०, रा. बोदवड) असे मृत विद्यार्थ्याचे नाव असून, ही घटना रविवारी (१५ फेब्रुवारी) दौलतनगर येथे घडली. घटनेनंतर परिसरात हळहळ व्यक्त केली जात आहे.
मिळालेल्या माहितीनुसार, श्याम पाटील हा गुलाबराव देवकर कॉलेज ऑफ फार्मसी येथे फार्मसीच्या द्वितीय वर्षात शिक्षण घेत होता. रविवारी त्याने राहत्या खोलीत गळफास घेऊन आत्महत्या केली. घटनेनंतर त्याच्या खिशात सुसाइड नोट आढळून आली असून, त्यामध्ये “कुठलीही चूक नसताना महाविद्यालयाच्या प्राचार्यांनी सर्वांसमोर मारहाण केली,” असा उल्लेख करण्यात आला आहे.
या घटनेमुळे शैक्षणिक वर्तुळात खळबळ उडाली आहे. विद्यार्थ्याच्या आत्महत्येमागील कारणांबाबत विविध चर्चांना उधाण आले आहे. दरम्यान, मयताचे वडील प्रभाकर पाटील यांनी रामानंदनगर पोलिस ठाणे येथे फिर्याद दाखल केली आहे. फिर्यादीत प्राचार्य योगेश पवार यांनी मुलास आत्महत्येस प्रवृत्त केल्याचा आरोप करण्यात आला आहे. त्यावरून पोलिसांनी संबंधित प्राचार्यांविरुद्ध गुन्हा नोंदवला असून, पुढील तपास सुरू आहे.
या घटनेमुळे विद्यार्थ्यांच्या मानसिक आरोग्याचा प्रश्न पुन्हा एकदा ऐरणीवर आला असून, शैक्षणिक संस्थांमधील वागणूक आणि शिस्तीच्या पद्धतींबाबत प्रश्नचिन्ह उपस्थित होत आहे. पोलिसांकडून सुसाइड नोट आणि अन्य पुराव्यांच्या आधारे सखोल तपास सुरू आहे.
