जळगाव (प्रतिनिधी) – महावितरणच्या अमळनेर उपविभाग १ व २ यांच्या संयुक्त विद्यमाने नगरपरिषद कार्यालयात ‘सेवा सेतू’ व ‘सेवा संकल्प’ अभियानांतर्गत आयोजित ग्राहक सेवा शिबिरात जळगाव परिमंडळाचे मुख्य अभियंता आय.ए. मुलाणी यांनी ग्राहकांशी थेट संवाद साधून त्यांच्या अडचणी जाणून घेतल्या. ग्राहकांच्या तक्रारी प्राधान्याने व वेळेत सोडवाव्यात, तसेच विविध योजनांची माहिती अधिकाधिक ग्राहकांपर्यंत पोहोचवावी, अशा सूचना त्यांनी अधिकारी व कर्मचाऱ्यांना दिल्या.
धरणगाव विभागाचे कार्यकारी अभियंता नीलेश सोनगिरे, अमळनेर नगरपरिषदेचे उपमुख्याधिकारी रवी चव्हाण, अतिरिक्त कार्यकारी अभियंता ज्ञानेश्वर अंबाडकर, उपकार्यकारी अभियंता मनोज भावसार यांची यावेळी प्रमुख उपस्थिती होती. शिबिरात नवीन वीजजोडणी, ग्राहकांच्या नावात व पत्त्यात बदल, वीजबिल आणि मीटरविषयक तक्रारींच्या निराकरणासाठी सुविधा उपलब्ध करून देण्यात आल्या. ग्राहकांना महावितरणच्या विविध सेवांची माहिती देतानाच त्यांच्या अडचणी सोडविण्यासाठी मार्गदर्शन करण्यात आले. यावेळी प्रधानमंत्री सूर्यघर मोफत वीज योजनेअंतर्गत तीन किलोवॅटपर्यंतच्या रूफटॉप सोलरसाठी पात्रतेनुसार ७८ हजार रुपयांपर्यंत मिळणाऱ्या अनुदानाची माहिती देण्यात आली. तसेच बीपीएल, मागासवर्गीय आणि १०० युनिटपेक्षा कमी वीजवापर असलेल्या पात्र ग्राहकांसाठीच्या ‘स्मार्ट’ योजनेची आणि शेतकऱ्यांसाठी ‘मागेल त्याला सौर कृषी पंप’ योजनेची माहिती देऊन जनजागृती करण्यात आली. ग्राहकांना एकाच ठिकाणी विविध सेवा उपलब्ध करून देणे, त्यांच्या तक्रारींचे वेळेत निराकरण करणे आणि शासकीय योजनांचा लाभ अधिकाधिक पात्र ग्राहकांपर्यंत पोहोचविणे, हा या अभियानाचा प्रमुख उद्देश आहे. ग्राहकांनी या शिबिराला उत्तम प्रतिसाद दिला.
