नवी दिल्ली (वृत्तसंस्था) लोकसभेच्या निवडणुकीची तयारी सुरू असताना ‘मूड ऑफ नेशन’ हा सर्व्हे (Lok Sabha Election Survey) इंडिया टुडे आणि सी-वोटरने केला. ज्यात आज लोकसभेच्या निवडणुका झाल्यास कोणाची सत्ता येईल आणि कोणत्या पक्षाला किती जागा मिळतील याचा अंदाज वर्तवण्यात आला आहे. त्यानुसार महाराष्ट्रात शिंदे गट आणि भाजपला मोठा धक्का बसणार आहे. (Maharashtra Political Survey)
देशात सर्वात जास्त जागा भाजपला !
जानेवारी २०२३ मध्ये गेल्या गेलेल्या या सर्व्हेमध्ये एकूण १ लाख ४० हजार ९१७ जणांनी सहभाग घेतला होता. यात अनेक मुद्द्यांवर नागरिकांनी आपली मतं मांडली आहेत. देशात आज लोकसभा निवडणूक झाली तर भाजपाला २८४ जागा, काँग्रेसला १०० आणि इतर पक्षांना १९१ जागा मिळू शकतात असा अंदाज सर्व्हेक्षणातून व्यक्त करण्यात आला आहे. मतदानच्या टक्केवारीबाबत बोलायचं झालं तर भाजपाला ३९ टक्के, काँग्रेसला २२ टक्के आणि इतर पक्षांच्या खात्यात ३९ टक्के मतदान होऊ शकतं. तर पंतप्रधानपदी कुणाला पाहायला आवडेल यावर आजही जनतेनं नरेंद्र मोदींवर सर्वाधिक विश्वास दाखवला आहे. मोदींच्या नावाला ५२ टक्के लोकांनी पसंती दिली आहे. तर १४ टक्के राहुल गांधी, ५ टक्के अरविंद केजरीवाल आणि ३ टक्के लोकांनी अमित शाह यांचं नाव घेतलं आहे.
महाराष्ट्रात भाजपा आणि शिंदे गटला मोठा धक्का !
लोकसभेच्या आता निवडणूका झाल्यास महाराष्ट्राचा विचार केल्यास या सर्व्हेक्षणातून भाजपा आणि शिंदे गटाला धक्का बसण्याची शक्यता आहे. काँग्रेसच्या नेतृत्वाखालील युपीएला कर्नाटक, महाराष्ट्र आणि बिहार या राज्यात फायदा होऊ शकतो. कर्नाटकात त्यांना १७ जागा मिळू शकतात. २०१९ मध्ये ही संख्या फक्त २ इतकी होती. महाराष्ट्रात युपीएला ३४ जागा मिळू शकतात. ही संख्या २०१९ मध्ये फक्त ६ होती. तर बिहारमध्ये १ वरून ते २५ वर पोहोचू शकतात. युपीएला एकूण ४८ जागांपैकी (काँग्रेस, शिवसेना आणि राष्ट्रवादी) ३४ जागा मिळू शकतात. म्हणजेच एकूण मतदानाच्या ४८ टक्के मतदान यूपीएच्या खात्यात जाऊ शकते. आता निवडणुका झाल्या तर उद्धव ठाकरे यांची शिवसेना, राष्ट्रवादी आणि काँग्रेसला भरघोस यश मिळू शकेल, असे या सर्वेक्षणातून समोर येत आहे. त्यामुळे हा सर्व्हे एनडीएसाठी म्हणजेच भाजपा आणि शिंदे गटला मोठा धक्का ठरू शकतो.
