चाळीसगाव प्रतिनिधी) मुलांसोबत पायी जाणाऱ्या महिलेच्या गळ्यातील सोन्याची पोत दुचाकीवरून आलेल्या चोरट्याने लांबविल्याची घटना १८ जूनला घडला होती. या प्रकरणी शहर पोलिसांनी सीसीटीव्ही फुटेजची पडताळणी तपासून सोनसाखळी लांबवणाऱ्या चोरट्याला शोधून औरंगाबाद जिल्ह्यातील पडेगाव येथील घरुन अटक केली आहे.
शहरातील हनुमान वाडीतील रहिवासी सुनंदा प्रमोद पाटील (वय ३५) या १८ रोजी सकाळी ११.२५ वाजेच्या सुमारास आपल्या ८ वर्षीय मुलासह शाळेची पुस्तके घेण्यास गेल्या होत्या. घराकडे परत येत असताना हनुमान वाडीतील कुलकर्णी यांच्या घरासमोर एक व्यक्ती काळ्या रंगाच्या शाइन या दुचाकीवर आला आणि सुनंदा पाटील यांच्या गळ्यातील सोन्याची पोत बळजबरीने तोडली होती. त्यानंतर तो चोरटा शासकीय विश्राम गृहाच्या दिशेने पळून गेला. चोरट्याने ७० हजारांची सुमारे २० ग्रॅम वजनाची सोन्याची पोत चोरून नेली होती. या प्रकरणी अज्ञात चोरट्या विरोधात गुन्हा दाखल झाला होता. दरम्यान, सोन्याची पोत चोरणारा दुचाकीवरील चोरटा सीसीटीव्ही कॅमेऱ्यात कैद झाला होता. पोलिसांनी तपासचक्र फिरवून सोनसाखळी लांबवणाऱ्या चोरट्याला शोधून औरंगाबाद जिल्ह्यातील पडेगाव येथील घरुन अटक केली आहे.
