चाळीसगाव (प्रतिनिधी) शहरातील नारायणवाडी भागात राहणाऱ्या नववीत शिकणाऱ्या विद्यार्थ्याचा डेंग्यूने मृत्यू झाल्याची घटना सोमवारी घडली. यश विवेक काळे (वय १४), असे मयत विद्यार्थ्याचे नाव आहे.
यशला चार- पाच दिवसांपासून तापाची लागण झाली होती. डॉक्टरांकडे दाखवल्यानंतरही ताप पूर्णतः उतरला नव्हता. शनिवारी यशला पुन्हा ताप आल्याने दुसऱ्या डॉक्टरांकडे दाखवले. डॉक्टरांनी गोळ्या, औषधी दिल्यानंतर रविवारी पुन्हा त्याची तब्येत बिघडली व अचानक चक्कर आले. कुटुंबीयांनी त्याला तत्काळ शहरातील एका खासगी दवाखान्यात दाखल केले. डॉक्टरांनी त्याला तपासून नाशिक येथे नेण्यास सांगितले.
नाशिक येथील नारायणी हॉस्पिटल या खासगी रुग्णालयात यशला दाखल केले असता, त्याच्यावर उपचार सुरु असताना सोमवारी दुपारी साडेतीनच्या सुमारास त्याचा मृत्यू झाला. यश हा अत्यंत हुशार मुलगा होता. त्याच्या पश्चात आजी, आई-वडील, लहान भाऊ, काका, काकू असा परिवार आहे. या घटनेमुळे नागरिकांमध्ये भीती पसरली असून पालिकेने डास प्रतिबंधक औषध फवारणीला गती द्यावी, अशी मागणी होत आहे.
