चाळीसगाव ( प्रतिनिधी ) – आमदार मंगेशदादा चव्हाण यांच्या संकल्पनेतून दरवर्षी महाविद्यालयीन विद्यार्थ्यांसाठी विधानसभा व विधानपरिषद अभ्यास दौऱ्याचे आयोजन करण्यात येते. याच उपक्रमाअंतर्गत यावर्षी नानासाहेब य. ना. चव्हाण वरिष्ठ महाविद्यालय, चाळीसगाव येथील राज्यशास्त्र विभागातील ४९ विद्यार्थी व ४ प्राध्यापक आज विशेष बसने मुंबईकडे रवाना झाले.
या अभ्यास दौऱ्याच्या प्रारंभी आमदार मंगेशदादा चव्हाण यांच्या कार्यालयात सर्व विद्यार्थी व प्राध्यापक एकत्र जमले होते. यावेळी महापुरुषांच्या जयघोषात उत्साहपूर्ण वातावरणात या अभ्यास दौऱ्याची सुरुवात करण्यात आली.
मुंबई येथे विद्यार्थी विधानसभा व विधानपरिषद या दोन्ही सभागृहातील कामकाज प्रत्यक्ष पाहणार आहेत. सभागृहातील चर्चा, प्रश्नोत्तरांची प्रक्रिया, विधिमंडळाचे कामकाज व लोकशाही पद्धतीने शासन व्यवस्था कशी चालते याची माहिती विद्यार्थ्यांना या अभ्यास दौऱ्यातून मिळणार आहे.
या अभ्यास दौऱ्यातील दोन्हीकडील प्रवास, मुंबईतील निवास व भोजन व्यवस्था तसेच मंत्रालयातील आवश्यक परवानग्या या सर्व खर्चाची जबाबदारी आमदार मंगेशदादा चव्हाण यांनी घेतली आहे.
या उपक्रमाचे समन्वयक राज्यशास्त्र विभाग प्रमुख प्रा. डॉ. राजु परभत निकम असून त्यांना प्राचार्य डॉ. गुणवंतराव बी. शेळके, उपप्राचार्य डॉ. जी. डी. देशमुख, डॉ. पी. एस. पाडवी, प्रा. एम. एस. बेलदार यांचे सहकार्य व मार्गदर्शन लाभले आहे.
तसेच कला शाखेबरोबरच विज्ञान शाखेतील विद्यार्थ्यांनाही विधानभवनाचा अनुभव मिळावा यासाठी संगणक विभाग प्रमुख प्रा. डॉ. पाटे, प्रा. कु. साक्षी चव्हाण, प्रा. कु. माधुरी देशमुख यांनी सहकार्य करून विद्यार्थ्यांची निवड करण्यात मदत केली आहे.
ग्रामीण भागातील विद्यार्थ्यांना पुस्तकातून शिकलेली लोकशाही व्यवस्था प्रत्यक्ष अनुभवता यावी या उद्देशाने आमदार मंगेशदादा चव्हाण यांच्या पुढाकारातून हा अभ्यास दौरा आयोजित करण्यात आला आहे.
