धरणगाव (प्रतिनिधी) तुम्हाला १७०० रुपयाचा कॅशबॅक आला आहे. तुमचा ‘फोन पे’ चे डिटेल पाठवा. तुम्हाला पैसे पाठवायचा आहे, असे बोलून एका १६ वर्षीय विद्यार्थ्याचा विश्वास संपादन करून त्याच्या आणि त्याच्या वडिलांच्या खात्यातून २ लाख ४३ हजाराची रक्कम खात्यातून परस्पर काढून ऑनलाईन फसवणूक केल्याप्रकरणी एकाविरुद्ध गुन्हा दाखल करण्यात आला आहे. धक्कादायक म्हणजे ऑनलाईन फसवणूक करणारा व्यक्ती अजूनही फोन करून संबंधितांकडे डीटेल्स मागत असल्याचेही कळतेय.
या संदर्भात ज्योती दिपक जाधव (वय ४३ वर्ष धंदा संचालक, लिटील ब्लॉसम स्कुल, धरणगाव रा. प्लॉट नं. ३९. गिताई निवास, चिंतामण मोरया नगर, धरणगाव) यांनी दिलेल्या फिर्यादीत म्हटले आहे की, त्यांचा सर्वेश जाधव (वय १६ वर्ष) याचे इंडीयन पोस्ट पेमेंट बँकेत खाते असून त्यावर तो व्यवहार करीत असतो. तसेच त्याचे फोन पे खाते देखील असून ते इंडीयन पोस्ट पेमेंट बँकेशी सलग्न आहे. १० एप्रिल रोजी शाळेतून घरी आल्यावर ज्योती जाधव यांना मुलगा सर्वेश रडून सांगायला की, सायंकाळी ५ वाजेच्या सुमारास घरी असतांना त्याच्या मोबाईलवर ८९६७७८८०२४ क्रमांकावरून फोन आला.
अशी झाली फसवणूक
फोनवरिल इसमाने त्यास तुझे ‘फोन पे’ अपडेट आले असून त्यामुळे तुम्हाला १७४० रुपयाचा कॅशबॅक भेटेल. त्यानंतर त्या व्यक्तीने मुलाला युपीआय आयडी बनविण्याकरीता सांगीतले. युपीआय आयडी बनविल्यानंतर फोनवर आलेला कोड मुलाने समोरच्या व्यक्तीला दिला. त्यानंतर त्याच्या इंडीयन पोस्ट पेमेंट बँकेच्या खात्यातून ४ हजार काढले गेल्याबाबत मॅसेज आला. त्यामुळे मुलाने पुन्हा सदर इसमास फोन केला. तेंव्हा सदर इसमाने काहितरी प्रॉब्लेम झाला आहे, असे सांगुन घरात दुसरा कोणाचा ‘फोन पे’ खाते असेल तर पाठविल्यास पैसे परत भेटतील, असे सांगीतले. त्यामुळे मुलाने वडीलांचा मोबाईल नंबर दिला.
खात्यातून २ लाख ३७ हजार २१७ रूपये उडवले
त्यानंतर सदर इसमाने त्यास पुन्हा दुसरा युपीआय आयडी बनविण्यास सांगीतला. मुलाने युपीआय आयडी बनविल्यानंतर मोबाईलवर कोड पाठविला. परंतु पैसे परत न आल्याने पुन्हा त्याने सदर इसमास फोन केला असता त्याने ‘एनी डेस्क’ नावाचे अॅप्लीकेशन डाऊनलोड करण्यास सांगीतले. तेंव्हा मुलाच्या मोबाईलवर कोड आला असता सदर कोड समोरील व्यक्तीस मागीतला. त्यावेळी आपल्या पतीचा मोबाईल मुलगा सर्वेशकडे असल्याने त्यांच्या मोबाईलवर पैसे विड्रोल झाल्याबाबतचे मॅसेज येऊ लागले. त्यामुळे आम्ही सदर मॅसेज बघीतले असता माझ्या पतीच्या स्टेट बँक ऑफ इंडीया व जनता बँकेचे खातेमधून व मुलाच्या खात्यातून एकुण २ लाख ३७ हजार २१७ रूपये काढले असल्याचे समजले. याबाबत शेवटी आपली फसवणूक झाल्याचे लक्षात येताच ८९६७७८८०२४ या अज्ञात मोबाईल धारकाविरुद्ध गुन्हा दाखल करण्यात आला असून पुढील तपास पोलीस निरीक्षक राहुल खेताळ हे करीत आहेत.
