नवी दिल्ली (वृत्तसंस्था) देशात कोरोनाग्रस्तांच्या रुग्णसंख्येत चढउतार पाहायला मिळत आहेत. गेल्या २४ तासांत ३८ हजार ३५३ नव्या कोरोनाबाधितांच्या संख्येत वाढ झाली आहे. तर ४९७ कोरोनाबाधितांचा मृत्यू झाला आहे. तसेच देशभरात गेल्या २४ तासांत ४० हजार ०१३ कोरोनामुक्त होऊन घरी परतले आहेत.
केंद्रीय आरोग्यमंत्रालयानं जारी केलेल्या आकडेवारीनुसार, देशात ३८ हजार ३५३ कोरोनाबाधित आढळले असून ४९७ जणांचा मृत्यू झालायं. सध्या देशात ३ लाख ८६ हजार ३५१ सक्रिय रुग्ण आहे. गेल्या १४० दिवसांतील ही सर्वात कमी सक्रिय रुग्णसंख्या आहे. तर रुग्ण बरे होण्याचा दर (रिकव्हरी रेट) ९७.४५ टक्क्यांवर आहे. गेल्या २४ तासांत ४० हजार ०१३ रुग्ण कोरोनातून बरे झाले आहेत. यासह आतापर्यंत बरे झालेल्या रुग्णांची संख्या ३ कोटी १२ लाख २० हजार ९८१ झाली आहे. दरम्यान, आठवड्याचा पॉझिटीव्हीटी रेट २.३४ टक्के असून दिवसाचा पॉझिटीव्हीटी रेट २.१६ टक्के आहे. गेल्या १६ दिवसांपासून पॉझिटीव्हीटी रेट ३ टक्क्यांपेक्षा कमी आहे. तर, गेल्या २४ तासांत ४१ लाख ३८ हजार ६४६ जणांचं लसीकरण झालं असून एकूण ५१ कोटी ९० लाख ८० हजार ५२४ जणांचं लसीकरण पूर्ण झालंय.
आरोग्य मंत्रालयाने आतापर्यंत सर्वच राज्ये आणि केंद्रशासित प्रदेशांना लशींचे ५३.२४ कोटी डोस पुरवले आहेत. तर, ७२ लाख ४० हजार २५० डोस लवकरच राज्यांना पुरवले जाणार आहेत. तर, सर्वच राज्यांकडे २.२५ कोटींपेक्षा जास्त डोस सध्या उपलबध आहेत. आज सकाळी ८ वाजेपर्यंतच्या आकडेवारीनुसार आतापर्यंत ५१ कोटी ५६ लाख ११ हजार ३५ डोस वापरले गेले आहेत. यामध्ये वाया गेलेल्या डोसचाही समावेश आहे, असे केंद्रीय आरोग्य मंत्रालयाने सांगितले.
राज्यातील स्थिती
राज्यात काल (बुधवार) ५,६०९ नवीन कोरोना रुग्णांची नोंद करण्यात आली आहे. तर ७ हजार ७२० रुग्ण कोरोनामुक्त झाले आहे. राज्यात आतापर्यंत ६१ लाख ५९ हजार ६७६ रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण ९६.८ टक्के आहे. तर राज्यात १३७ रुग्णांच्या मृत्यूची नोंद झाली आहे. त्यामुळे राज्याचा मृत्यूदर २.०१ टक्के झाला आहे. तब्बल ३० महापालिका क्षेत्र आणि जिल्ह्यांमध्ये आज एकही मृत्यूची नोंद झालेली नाही. राज्यात सध्या ६६ हजार १२३ रुग्णांवर उपचार सुरु आहेत.
