इस्लामाबाद (वृत्तसंस्था) आर्थिक अरिष्टाच्या संकटात अडकलेल्या पाकिस्तानला मोठा दिलासा मिळाला आहे. भारत पाकिस्तानला ४.५ कोटी लसींचा पुरवठा करणार आहे. United GAVI alliance अंतर्गत भारताकडून हा लसींचा पुरवठा होणार असल्याचं राष्ट्रीय आरोग्य सेवा, नियमन आणि समन्वय फेडरल सेक्रेटरी आमीर अशरफ ख्वाजा यांनी सार्वजनिक लेखा समितीला सांगितलं आहे.
पाकिस्तानचे राष्ट्रीय आरोग्य सेवेचे सचिव आमिर अशरफ ख्वाजा यांनी सांगितले की, पाकिस्तानला भारतात बनवण्यात आलेली कोरोना लस या महिन्यात मिळणार आहे. पाकिस्तानमध्ये याआधी चीनने दिलेल्या कोरोना लशीने लसीकरण कार्यक्रम सुरू आहे. आतापर्यंत २७.५ दशलक्ष लोकांना कोरोनाची लस देण्यात आली असल्याची माहिती ख्वाजा यांनी दिली. यामध्ये अत्यावश्यक सेवेतील कर्मचारी आणि ज्येष्ठ नागरिकांचा समावेश आहे.
पाकिस्तान सरकारनने याआधीच यावर्षी एकही लस खरेदी करणार नसल्याचे म्हटले होते. कोरोनाशी लढण्यासाठी पाकिस्तान हर्ड इम्युनिटी आणि चीन व कोवॅक्सकडून मदत म्हणून मिळणाऱ्या लशीवर अवलंबून असणार आहे. पाकिस्तानची अर्थव्यवस्था संकटात असून मागील काही वर्षांमध्ये कर्जाच्या रक्कमेत वाढ झाली आहे. पाकिस्तानच्या नागरिकांवर दरडोई एक लाख ७५ हजार रुपयांचे कर्ज आहे. यापैकी ४६ टक्के कर्ज हे इम्रान खान सत्तेवर आल्यानंतर वाढले आहे. कोरोनाविरोधातील लशीकरण मोहिमेतून गरीब, विकसनशील देश वंचित राहू नये यासाठी कोवॅक्सची योजना तयार करण्यात आली आहे. कोवॅक्समध्ये जागतिक आरोग्य संघटनेसह जगातील ६० टक्के बालकांसाठी लसीकरण मोहीम राबवणाऱ्या GAVI मध्ये सार्वजनिक-खासगी संस्थांचा सहभाग आहे. GAVI या संस्थेला बिल अॅण्ड मेलिंडा गेट्स फाउंडेशनकडून मोठ्या प्रमाणावर निधी देण्यात येतो.
ख्वाजा यांनी दिलेल्या माहितीनुसार, GAVI करारांतर्गत ४.५ कोटी लसीचे डोस मिळणार असून यामधील १.६ कोटी डोस हे जून महिन्यापर्यंत उपलब्ध होतील. पाकिस्तानी प्रसारमाध्यमांच्या वृत्तानुसार, समितीला माहिती देत असताना सिनेटर मुशहिद हुसैन सय्यद यांना लसीचे डोस कुठून येत आहेत यासंबंधी विचारणा करण्यात आली. यावेळी आरोग्य सचिवांनी पाकिस्तानला सीरम इन्सिट्यूट ऑफ इंडियामध्ये तयार होणारे लसीचे डोस मिळणार असल्याची माहिती दिली. “GAVI करारांतर्गत भारतात निर्मिती करण्यात आलेली लस पाकिस्तानी नागरिकांना उपलब्ध होणार आहे. विकसनशील आणि गरीब देशांना लस पुरवणं हा या कराराचा मुख्य हेतू आहे,” असं यावेळी त्यांनी सांगितलं.
