मुंबई (वृत्तसंस्था) दिग्गज भारतीय क्रिकेटपटूंना कोरोनाची लागण होण्याचं सत्र सुरुच आहे. सचिन तेंडुलकर, इरफान पठाण, यूसूफ पठाण आणि एस. बद्रीनाथ या चार खेळाडूंना यापूर्वी कोरोनाची लागण झाली होती. आता त्यानंतर भारतीय महिला टी २० टीमची कॅप्टन हरमनप्रीत कौर हिची कोरोना टेस्ट पॉझिटिव्ह आली आहे. सध्या ती घरातच आयसोलेट असून डॉक्टरांच्या मार्गदर्शनाखाली उपचार घेत आहे.
भारतीय महिला संघाची नुकतीच दक्षिण आफ्रिकेविरुद्ध एकदिवसीय मालिका पार पडली. या मालिकेत हरमनप्रीत भारतीय संघात सामिल होती. ही मालिका पार पडल्यानंतर हरमनप्रीतला कोरोनाची लक्षणे जाणवू लागल्याने तिने टेस्ट केली असता तिला कोरोनाची बाधा झाल्याचं समोर आलं आहे. हरमनप्रीतशिवाय भारताच्या आणखी चार माजी खेळाडूंना कोरोनाची लागण झाली आहे. पटियालामध्ये राहणाऱ्या हरमनप्रीतला कोरोनाची बाधा झाल्याने डॉक्टरांच्या निगराणीखाली तिच्यावर घरीच उपचार सुरु आहेत. तिला घरातच आयसोलेशनमध्ये ठेवण्यात आलं आहे.
हरमनप्रीत कौरची भारत-दक्षिण आफ्रिका मालिकेच्या दरम्यान नियमित कोरोना चाचणी करण्यात आली होती. ही मालिका संपल्यानंतरच तिला कोरोनाची लागण झाल्याचं सूत्रांनी सांगितलं. दक्षिण आफ्रिकेच्या वन-डे आणि टी-२० मालिकेत भारताचा पराभव झाला. पण या मालिकेत हरमनप्रीतनं एक अर्धशतक झळकावले होते.
