गडचिरोली (वृत्तसंस्था) अतिदुर्गम कोरची तालुक्यातील बेडगावपासून सहा किमी अंतरावर असलेल्या दवंडी येथील एका किराणा दुकानदाराची धारदार शस्त्राने हत्या केल्याची घटना ११ ऑक्टोबर रोजी घडली होती. या सिनेस्टाईल हत्याकांडाचा गडचिरोली पोलिसांनी पर्दाफाश केला असून, पत्नीनेच प्रियकराच्या मदतीने पतीची हत्या केल्याचे उघड झाले आहे. या हत्याकांडाच्या गुन्ह्यात तीन आरोपींना पोलिसांनी ताब्यात घेतले आहे.
अज्ञात ५ ते ६ हल्लेखोरांनी खून केल्याचा रचला बनाव !
लखन सुन्हेर सोनार (वय ३८) असे हत्या झालेल्या किराणा दुकानदाराचे नाव आहे. तर सरिता लखन सोनार, सुभाष हरिराम नंदेश्वर (दोघेही रा. दवंडी) व बळीराम गावडे (रा. कुकडेल) अशी आरोपींची नावे आहेत. घटनेच्या दिवशी अनोळखी ५ ते ६ काळे कपडे परिधान केलेल्या व्यक्तींनी लखन सोनार यांच्या घरात शिरून त्यांच्या पत्नीसमोर धारदार शस्त्राने हत्या केली होती. याप्रकरणी कोरची पोलीस ठाण्यात कलम ३०२, ३४ भादंवि अन्वये १२ ऑक्टोबर रोजी ९. २५ वाजता अज्ञात आरोपींविरूद्ध गुन्हा दाखल करण्यात आला होता.
पोलीस तपासात समोर आली अनैतिक संबंधाची माहिती !
घटनेचे गांभीर्य लक्षात घेता पोलिसांनी तात्काळ तपासचक्र फिरवायला सुरुवात केली. मयताची पत्नी नामे सरिता लखन सोनार हिचे सुभाष हरिराम नंदेश्वर या व्यक्तीसोबत अनैतिक संबंध असल्याच्या कारणावरून पती लखन सोबत नेहमीच वाद होत असल्याची धक्कादायक माहिती पोलीस तपासात समोर आली. याच माहितीच्या आधारे तपासाची दिशा ठरवत मयताच्या पत्नीकडे अधिक विचारपूस सुरु केली.
९ ऑक्टोबर रोजी रचला हत्येचा कट !
सुरुवातीला तिच्याकडून उडवाउडवीची उत्तरे देण्यात आली. नंतर मात्र, तिला विश्वासात घेऊन विचारपूस केली असता तिने प्रियकर व त्याच्या साथीदाराच्या मदतीने गुन्हा केल्याचे निष्पन्न झाले आहे. मृत लखन हा पत्नीच्या चारित्र्यावर संशय घेऊन नेहमी भांडण करत होता. या त्रासाला कंटाळून आरोपी पत्नी सरिता हिने तिचा प्रियकर सुभाष नंदेश्वर याला सर्व हकिकत सांगत पतीचा काटा काढावा, याकरिता तगादा लावला. ९ ऑक्टोबर रोजी लखन सोनार याच्या हत्येचा कट रचून हत्येची जबाबदारी बळीराम गावडे (रा. कुकडेल) याच्याकडे दिली.
‘त्या’ रात्री नेमके काय घडले?
११ ऑक्टोबरच्या रात्री सरिता व लखन एका खोलीत झोपले होते. मुलगी पायल व मुलगा प्रणय हे वेगळ्या खोलीत होते. आधीच ठरल्याप्रमाणे सरिताने रात्री झोपताना घराच्या दरवाजाची आतून कडी न लावता फक्त लोटून घेतला. त्यानंतर दारूच्या नशेत सुभाष नंदेश्वर व बळीराम गावडे यांनी घरात प्रवेश करून धारदार शस्त्राने झोपेतच लखनच्या गळ्यावर वार करून निर्घृण हत्या केली. मारेकरी पळून गेल्यावर सरिताने आरडाओरड करून अज्ञातांनी पतीला संपविल्याचा बनाव रचला होता. दरम्यान, सोनार दाम्पत्यास दोन अपत्ये आहेत. वडिलांचा खून तर आई जेलमध्ये गेल्यामुळे मुलगी पायल (१६), मुलगा प्रणय (१२) हे निराधार झाली आहेत.