जळगाव (प्रतिनिधी) छत्रपती संभाजीनगर रस्त्यावर नेक्सा शोरूमसमोर घरी जाण्यासाठी रिक्षाची वाट पाहत उभ्या असलेल्या वृद्धाला अज्ञात कारने उडविल्याची घटना मंगळवारी रात्री ११ वाजेच्या सुमारास घडली. या वृद्धाचा रूग्णालयात उपचारादरम्यान, मृत्यू झाला. राजकुमार सोमोमल धामेचा (६५, रा. सम्राट कॉलनी), असे मयत वृद्धाचे नाव आहे.
राजकुमार धामेचा हे गेल्या १० वर्षांपासून एमआयडीसीतील बाबा नमकीन येथे नोकरीला होते. मंगळवारी प्रकृती बरी नसल्यामुळे ते रात्री घरी येण्यासाठी नेक्सा शोरूमसमोर घरी जाण्यासाठी रिक्षाची वाट पाहत उभे होते. त्याचवेळी मागून अज्ञात कारने त्यांना जोरदार धडक दिली. या धडकेत धामेचा यांच्या डोक्याला गंभीर दुखापत झाली.धामेचा हे जखमी अवस्थेत पडलेले असताना, त्यांना वाचविण्यासाठी काही तरूणांनी रूग्णवाहिकांना व पोलिसांना संपर्क साधला. पण, मदत उशिराने मिळाल्यामुळे धामेचा यांचा रूग्णालयात मृत्यू झाला. याबाबत एमआयडीसी पोलीस ठाण्यात अकस्मात मृत्यूची नोंद करण्यात आली आहे. पुढील तपास पोहेकॉ. अल्ताफ पठाण आणि सिध्देश्वर डापकर करीत आहे
