जळगाव (प्रतिनिधी) शहरातील बळीराम पेठ परिसरातील भाजपच्या ‘वसंत स्मृती’ या जिल्हा कार्यालयाच्या आवारात शनिवारी रात्री अज्ञात व्यक्तीने कचरा जाळल्यामुळे प्रचंड खळबळ उडाली होती. या प्रकरणी शहर पोलिसांनी एका संशयित मनोरुग्णाला ताब्यात घेतले आहे.
भाजप जिल्हा कार्यालयाच्या अगदी दरवाजात आणून कचरा जाळण्यात आला होता. त्यानंतर सहाय्यक पोलीस अधीक्षक कुमार चिंथा यांनी या कार्यालयाला भेट देऊन घटनास्थळाची पाहणी केली . त्यांनी पोलिसांना सूचना दिल्यावर शहर पोलीस ठाण्याच्या कर्मचाऱ्यांनी एका मनोरुग्ण संशयिताला ताब्यात घेतले आहे. विजय श्रीराम पवार (रा. मामलेदार केचरीजवळ, बळीराम पेठ) याने मध्यरात्री २ वाजेच्या सुमारास कचरा आणि टायर बंद असलेल्या लाकडी दरवाजा जवळ टाकले. त्यानंतर तो कचरा पेटवून दिला. यात दरवाजा अर्धवट जळाला. याप्रकरणी भाजपा कार्यालयीन कर्मचारी प्रकाश भगवान पंडीत यांच्या फिर्यादीवरून शहर पोलीस ठाण्यात अज्ञात व्यक्तीविरोधात गुन्हा दाखल करण्यात आला होता. तपासाअंती भाजप कार्यालयात काम करणारा विजय पवार असल्याचे समोर आले. विजय पवार हा मनोरूग्ण आल्याने त्याला शहर पोलीसांनी ताब्यात घेतले आहे. दरम्यान, काही दिवसांपूर्वी या कार्यालयात जिल्हा पदाधिकाऱ्यांची बैठक सुरु असताना एकाने थेट शिवीगाळ करत गिरीश महाजन यांच्या वाहनाच्या दिशेने दगड भिरकावला होता. एकनाथराव खडसे यांनी राष्ट्रवादीत प्रवेश केल्यानंतर एकामागून एक धक्कादायक घडामोडी घडत असल्यामुळे भविष्यात राजकीय वातावरण तापणार असल्याचे चित्र निर्माण झाले आहे.
