जळगाव (प्रतिनिधी) क्रिप्टो करंन्सीमध्ये गुंतवणूक करुन जास्त नफा देण्याचे आमिष दाखवून एकाची १५ लाख ३५ हजार रुपयात फसवणूक केल्याप्रकरणी मंगळवारी जळगाव सायबर पोलिसात गुन्हा दाखल करण्यात आला आहे. शहरातील पवन बळीराम सोनवणे (वय २५, रा. देविदास कॉलनी), असे फसवणूक झालेल्या तरुणाचे नाव आहे.
पवन हा मुंबईत एका खासगी कंपनीत नोकरीला आहे. १२ एप्रिल २०२३ रोजी अनोळखी मोबाईल क्रमांकावरुन पवनला जॉब ऑफर करणारा मॅसेज आला. त्यावर रिप्लाय केला असता पवनला युट्युब लिंक पाठवल्या. या लिंकवरुन नंतर टेलिग्राम युझर आयडी दिला. पवनचा विश्वास संपादन करण्यासाठी ठगाने दोन हजार रुपये बोनस पवनच्या बँक खात्यात जमा केला. यानंतर क्रिप्टो करंन्सीमध्ये पैसे गुंतवणूक केल्यास अधिक नफा प्राप्त करुन देतो, असे आमिष तसेच खोटे आश्वासन संबंधितांनी पवन यास दिले. या बदल्यात पवन याच्याकडून संबंधितांनी २२ एप्रिलपर्यंत वेळोवेळी तब्बल १५ लाख ३५ हजार रुपयांची रक्कम ऑनलाईन स्विकारली. त्या मोबदल्यात कोणतीही रक्कम पवन यास परत केली नाही. अखेर फसवणूक झाल्याचे लक्षात आल्यावर पवन याने सायबर पोलिस ठाण्यात गुन्हा दाखल केला असून पुढील तपास पोलिस निरीक्षक अशोक उत्तेकर हे करीत आहेत.
