जळगाव (प्रतिनिधी) येत्या २ ऑक्टोबर रोजी म. गांधी जयंतीनिमित्त जळगाव शहर महानगरपालिकातर्फे दोन नाविन्यपूर्ण प्रोजेक्टचे लोकार्पण करण्यात येत आहे. यामध्ये महानगरपालिकेतर्फे विविध ५६ विभागांमार्फत पुरवण्यात येणाऱ्या नागरी सेवांशी संबंधित आहे. हा पहिला प्रोजेक्ट आयुक्त डॉ. विद्या गायकवाड यांच्या मार्गर्शनाखाली राबविण्यात येत आहे.
नागरी सेवांशी संबंधित व्हिडिओ शृंखला ‘आता मी काय करू?’
जन्म दाखला, मृत्यु दाखला, बांधकाम परवानगी, नळ जोडणी आणि या सारख्या इतर कामांसाठी नागरिकांना महानगरपालिकेत येणाऱ्या अडचणी लक्षात घेऊन कोणत्या कामासाठी, कोणत्या विभागात जावे, त्यासाठी कोणकोणती कागदपत्रे लागतात आणि त्या कामासाठी लागणारे शासकीय शुल्क इत्यादींची इत्यंभूत माहिती असलेली माहितीपूर्ण व्हिडिओ शृंखला ‘आता मी काय करू?’ चे २ ऑक्टोबर रोजी म. गांधी जयंतीनिमित्त लोकार्पण करण्यात येत आहे. विशेष म्हणजे संपूर्ण राज्यात अशा प्रकारची नागरी सेवांशी संबंधित व्हिडिओ शृंखला बनविणारी जळगाव मनपा राज्यात पहिली ठरली आहे. भविष्यात हा ‘जळगाव पॅटर्न’ राज्यातील इतर महापालिका राबविण्याची शक्यता नाकारता येत नाही.
मराठी चित्रपट सृष्टीतील दिग्गज कलाकारांनी दिल्या शुभेच्छा !
या व्हिडिओ श्रृंखलेच्या प्रचार आणि प्रसारासाठी मराठी चित्रपट सृष्टीतील दिग्गज सिने अभिनेते सुबोध भावे, विजय पाटकर, अभय कुलकर्णी आणि इतर अनेक कलाकारांनी शुभेच्छा आणि आवाहन असलेले व्हिडिओ संदेश दिले आहेत. सदर ५६ व्हिडिओ शृंखलेपैकी प्रथम १७ व्हिडिओ २ ऑक्टोबर रोजी जळगाव शहर महानगरपालिका च्या सर्व सोशल मीडिया खात्यांवरुन प्रसारित करण्यात येणार आहेत.
एन.व्ही टेक्नॉलॉजी सर्व्हिसेसने केली व्हिडिओची निर्मिती !
या व्हिडिओची निर्मिती एन.व्ही टेक्नॉलॉजी सर्व्हिसेस यांच्या रिंगरोड स्थित क्रिएटर्स अकॅडमी अँड स्टुडिओ या ठिकाणी चित्रित करण्यात आले असून याची संकल्पना आणि लेखन निलेश वर्मा यांचे आहे. पुणे येथील मनुश्री बिहाडेसह स्थानिक कलाकार ऋषिकेश धर्माधिकारी, उज्वला वर्मा, संदीप केदार, दीपक महाजन या अनुभवी कलाकारांनी यात सहभाग घेतला आहे. दिग्दर्शन प्रशांत सोनवणे तर कला दिग्दर्शन हर्षदा गावडे यांनी केले आहे. मेकअप किरण अडकमोल, कॅमेरा अक्षय परांजपे, सहायक कॅमेरा ओंकार शिंदे, संकलन सुहास चोगले यांचे आहे. जळगाव शहरातील सर्व नागरिकांना महानगरपालिकेतर्फे करण्यात येणारे आवाहने आणि पुरवण्यात येणाऱ्या सेवांबद्दल माहिती व्हावी या उद्देशाने आयुक्त डॉक्टर विद्या गायकवाड यांच्या संकल्पनेतून जळगाव शहर महानगरपालिका सर्व सोशल मीडिया माध्यमांवर JCMC Digital नावाने उपलब्ध करून देण्यात आली आहे.
महापालिकेच्या सोशल मिडीयातील खात्यांवरूनही मिळणार माहिती !
महानगरपालिकेतर्फे वेळोवेळी पुरवण्यात येणाऱ्या सेवा सुविधांची, योजना, पाणीपुरवठा वेळापत्रकात होणारे बदल इत्यादी माहिती नागरिकांना त्वरित मिळावी यासाठी जळगाव शहर महानगरपालिकेने फेसबुक ट्विटर आणि इंस्टाग्रामवर आपले खाते सुरू केले असून नागरिकांनी JCMC Digital या नावाने खाते शोधून त्यास लाईक आणि फॉलो करावे जेणेकरून त्यांना भविष्यात प्रसारित करण्यात आलेली माहिती त्वरित उपलब्ध होईल. तसेच जळगाव शहर महानगरपालिकेतर्फे अधिकृत व्हॉट्सॲप चॅनल देखील सुरू करण्यात आले असून नागरिकांना व्हॉट्सॲपच्या माध्यमातून देखील माहिती उपलब्ध होणार आहे. सदर व्हॉट्सॲप चॅनलची लिंक मनपाच्या सोशल मीडिया खात्यांवर उपलब्ध करून देण्यात आली आहे.
व्हिडिओज जास्तीत जास्त शेअर करावे : आयुक्त डॉ. विद्या गायकवाड !
महानगरपालिकेचे सोशल मीडिया खाते हाताळण्यासाठी एका तज्ञ टीमची व्यवस्था करण्यात आली असून या टीमद्वारे सोशल मीडिया खात्यांचे व्यवस्थापन करण्यात येणार आहे. सोशल मीडिया व्यवस्थापन क्षेत्रात मोठा अनुभव असलेली शहरातील प्रसिद्ध डिजिटल मार्केटिंग कंपनी एन.व्ही. टेक्नॉलॉजी सर्व्हिसेस यांच्या सी.एस.आर ऍक्टिव्हिटीच्या माध्यमातून तीन वर्षांसाठी महापालिकेचे सोशल मीडिया खाते मोफत हाताळण्यात येणार आहेत. तरी जास्तीत जास्त नागरिकांनी महानगरपालिकेच्या सोशल मीडिया खात्यांना लाईक आणि फॉलो करावे. सदर व्हिडिओज जास्तीत जास्त शेअर करावे, असेही आवाहन मनपा प्रशासक तथा आयुक्त डॉ विद्या गायकवाड यांनी केले आहे.
