मुंबई (वृत्तसंस्था) ‘सँडल वुड ड्रग्ज’ प्रकरणात फरार आरोपी आदित्य अल्वाच्या शोधात केंद्रीय गुन्हे शाखेने अभिनेता विवेक ओबेरॉयच्या घरी छापा टाकला आहे. अल्वा हा विवेक ओबेरॉयच्या पत्नीचा भाऊ आहे. त्यामुळे आदित्य विवेकच्या घरात लपला असल्याची माहिती केंद्रीय गुन्हे शाखेला अर्थात सीसीबीला मिळाली आहे.
आदित्य अल्वा फरार असून, पोलीस कसोशीने त्याला शोधण्याचा प्रयत्न करत आहेत. विवेक ओबेरॉय त्याचा नातेवाईक असल्याने तो सध्या विवेकच्या घरी लपून बसल्याची माहिती केंद्रीय गुन्हे शाखेला मिळाली होती. त्यानुसार कोर्टाकडून वॉरंट घेऊन, मुंबईची सीसीबीची टीम विवेकच्या घरी पोहोचली आहे. सध्या बॉलिवूड ड्रग्स प्रकरणामुळे चर्चेत आले आहे. ड्रग्जच्या बाबतीत गेल्या काही दिवसांत बऱ्याच लोकांना पोलिसांनी ताब्यात घेतले आहे. या प्रकरणात सीसीबीने मागील महिन्यात विवेक ओबेरॉयचा मेहुणा आदित्य अल्वा याच्या घराची तपासणी करण्यासाठी सर्च वॉरंट जारी केले होते. त्यानंतर कर्नाटकचे माजी मंत्री जीवराज अल्वा यांच्या घराचीही झडती घेण्यात आली होती.
