जळगांव (प्रतिनिधी) नातेवाईकांना भेटून घराकडे निघालेल्या दुचाकीस्वार दाम्पत्याला भरधाव वाहनाने धडक दिली. या अपघात दिपाली योगेश कोळी (वय २२, रा. जूना असोदा रोड) या आठ महिन्याची गर्भवती महिलेचा जागीच मृत्यू झाला. तर तिचे पती व तीन वर्षाची मुलगी गंभीर जखमी झाले. ही घटना रविवारी सायंकाळच्या सुमारास वराड गावाजवळ घडली.
नातेवाईकांना भेटून घरी परताना झाला अपघात !
शहरातील जूना असोदा रोड परिसरात योगेश गुलाब कोळी (वय २८) हा तरुण राहत असून तो खासगी वाहनावर चालक म्हणून नोकरीस आहे. आज रविवार सुट्टी असल्याने तो पत्नी दिपाली व तीन वर्षाची मुलगी काव्या हीला घेवून निमगव्हाण येथे नातेवाईकांकडे भेटण्यासाठी गेले होते. तेथून घरी परतत असतांना मागून भरधाव वेगाने येणाऱ्या (एमएच १९, सीएफ ९७९७) क्रमांकाच्या कारने वराड गावाजवळ दुचाकीस्वार दाम्पत्याला जोरदार धडक दिली. या अपघातात आठ महिन्याची गर्भवती असलेल्या दिपाली यांचा जागीच मृत्यू झाला, तर तिचे पती योगेश व मुलगी काव्या हे दोघं गंभीर जखमी झाले.
जखमी बापलेकीवर उपचार सुरु
अपघातात महिला जागीच ठार झाल्याची माहिती मिळताच ग्रामस्थांनी तात्काळ घटनास्थळी धाव घेत जखमींना जिल्हा शासकीय वैद्यकीय रुग्णालयात दाखल केले. याठिकाणी प्राथमिक उपचार केल्यानंतर त्यांना खासगी रुग्णालयात दाखल केले असून त्याठिकाणी त्यांच्यावर उपचार सुरु आहेत.
रुग्णालयात नातेवाईकांचा आक्रोश
अपघातात मयत झालेल्या दिपाली या आठ महिन्यांच्या गर्भवती होत्या. दुर्देवी काळाने त्यांच्यावर झडप घातल्याने मातृदिनाच्या दिवशी तिचा मृत्यू झाला. या घटनेमुळे परिसरात हळहळ व्यक्त केली जात होती. घटनेची माहिती मिळाल्यानंतर नातेवाईकांनी जिल्हा रुग्णालयात धाव घेत एकच आक्रोश केला होता.
