जळगाव (प्रतिनिधी) माहेरी गेलेल्या पत्नीला घेण्यासाठी जात असलेल्या पतीचा धावत्या रेल्वेतून पडल्याने जागीच मृत्यू झाल्याची दुर्दैवी घटना शनिवारी ३० डिसेंबर रोजी सकाळी ८ वाजेच्या सुमारास शहरातील प्रतापनगर जवळ घडली आहे. किसन गवळी (वय ४५, रा. पवननगर), असे मयताचे नाव आहे.
शहरातील प्रजापत नगरातील पवन नगर येथे धर्मा गवळी हे कुटुंबियांसह वास्तव्यास असून ते बांधकामाच्या ठिकाणी सेंटरिंगचे काम नोंद करुन कुटुंबाचा उदनिर्वाह करीत होते. त्यांची पत्नी खंडवा येथे माहेरी गेलेल्या असल्याने ते पत्नीला आणण्यासाठी शनिवारी सकाळी निघाले. घरापासून अवघ्या काही अंतरावरील प्रजापत नगरजवळील रेल्वे रुळावर खांबा क्रमांक ४२१/२बी ते ४२१/४बी दरम्यान ते रेल्वेतून खाली पडले.
नागरिकांनी धाव घेऊन तालुका पोलिसांना माहिती दिली. त्या वेळी गंभीर जखमी झालेल्या धर्मा गवळी यांना शासकीय वैद्यकीय महाविद्यालय व रुग्णालयात हलविण्यात आले. याठिकाणी वैद्यकीय अधिकाऱ्यांनी त्यांची तपासणी करीत मयत घोषीत केले. याप्रकरणी तालुका पोलिसात अकस्मात मृत्यूची नोंद करण्यात आली आहे. रेल्वेतून पडून मयत झालेल्या धर्मा गवळी यांच्या खिशात रेल्वेचे तिकीटही आढळून आले. धर्माच्या यांच्यावर दुर्देवी काळाने झडप घालीत हिरावून घेतल्याने त्यांच्या कुटुंबियांवर दुःखाचा डोंगर कोसळला आहे. त्यांच्या निधनामुळे तीन मुले पोरकी झाली आहे.
