जळगाव (प्रतिनिधी) मला ड्रग माफिया ठरविण्यासाठी एकनाथराव खडसे, ॲड. प्रवीण चव्हाण हे वारंवार फोन करून तत्कालीन गृहमंत्री अनिल देशमुख यांच्यावर दबाव आणत होते, असा खळबळजनक आरोप माजी मंत्री गिरीश महाजन यांनी केला आहे. दरम्यान, या आरोपांचा एकनाथराव खडसे यांनी इन्कार केला असून याच्याशी आपला काहीही संबंध नसल्याचे म्हटले आहे.
अनिल देशमुख यांनीस्वतः माहिती दिल्याचा गिरीशभाऊंचा दावा
ॲड. प्रवीण चव्हाण यांच्या कार्यालयात झालेल्या चर्चेचे रेकॉर्डींग तत्कालीन विरोधी पक्षनेते देवेंद्र फडणवीस यांनी विधीमंडळात सादर केले होते. आता हा तपास सीबीआयकडे देण्यात आल्याने कोणी काय-काय केले?, या उघड होणार आहे. महाजन पुढे म्हणाले की, माझ्या वाहनामध्ये ड्रग, हत्यार ठेवून मला ड्रग माफिया ठरविण्यासाठी मोठे प्रयत्न झाले मात्र ते सर्व अयशस्वी ठरले. खडसे यांनी वारंवार फोन करून मला वेडे केले आहे, असे खुद्द अनिल देशमुख आपल्याला सांगत होते, असा दावादेखील महाजन यांनी केला आहे.
पोलीसच खिशात ड्रग घेऊन फिरायचे
ॲड. प्रवीण चव्हाण यांच्या कार्यालयात झालेल्या चर्चेच्या रेकॉर्डींग प्रकरणाचा तपास आता सीबीआयकडे देण्यात आल्याने या विषयी माहिती देताना गिरीश महाजन पुढे म्हणाले की, मी ड्रग माफिया आहे, हे दाखविण्यासाठी माझ्या वाहनात ड्रग टाकण्याचे ठरले होते. अगदी पोलीसच खिशात ड्रग घेऊन फिरायचे असा धक्कादायक आरोपदेखील गिरीश महाजन यांनी केला आहे.
खडसे बिल भरणार होते
ॲड. चव्हाण यांच्या कार्यालयात जो कट शिजला त्यामध्ये काय-काय करायचे, कोठे जायचे, कोणी कोणाचे बिल भरायचे, जेवणाचे बिल कोणी भरायचे, हे सर्व रेकॉर्डींगमध्ये आले असून त्यात अॅड. विजय पाटील यांनीही काय सुचविले, हे ऐकू येते, असेही महाजन म्हणाले. अगदी खडसे हेदेखील कोणाचे बिल भरणार होते, हेदेखील आता सीबीआय तपासात समोर येणार आहे.
रक्ताने माखलेला चाकू ठेवण्याचा प्रयत्न फसला
माझ्या वाहनात ड्रग सोबत हत्यार ठेवण्याचाही कट रचला गेला. यात मला अडकून गिरीश महाजनला संपवायचे नंतर देवेंद्र फडणवीस यांना संपवायचे व आपोआप भाजप संपणार, असा प्रयत्न होता, असे महाजन म्हणाले. माझ्या वाहनात चाकू ठेवण्यासाठी विजय भास्कर पाटील हे चाकू घेऊन आलेही होते. मात्र त्यांना संधी मिळाली नाही. या विषयी ॲड. प्रवीण चव्हाण यांनी पाटील यांना जाबही विचारला. मात्र तेथे पोलीस असल्याने चाकू ठेवता आली नाही, असे पाटील यांनी त्यांना सांगितले होते, असाही दावा गिरीश महाजन यांनी केला आहे. चाकूला एखाद्या प्राण्याचे रक्त लावून तो वाहनात ठेवण्याचे त्या वेळी ठरले होते, मात्र तो प्रयत्न फसल्याचे महाजन म्हणाले. दरम्यान, महाजन यांनी जो आरोप केला, त्या प्रकरणाशी आपला काहीही संबंध नाही. तपासात जे काही असेल, ते स्पष्ट होईलच, अशी प्रतिक्रिया एकनाथराव खडसे यांनी दिली आहे.
