भुसावळ (प्रतिनिधी) भुसावळ पालिकेचे उपनगराध्यक्ष रमेश नागराणी यांनी पदाचा राजीनामा दिल्याने रीक्त जागेवर गुरुवारी ऑनलाईन पद्धतीने निवडणूक झाली. या निवडणुकीत नगरसेवक प्रमोद नेमाडे यांची बिनविरोध निवड करण्यात आली आहे. या निवडणूकीत खडसे गटाचे वर्चस्व राहिले.
भुसावळ पालिकेत उपनगराध्यक्ष पदासाठी आज गुरुवारी ऑनलाईन पद्धतीने निवडणूक झाली. यात प्रमोद नेमाडे व पिंटू ठाकूर यांनी या पदासाठी अर्ज घेतला असला तरी निवडणूक बिनविरोध करण्याचे ठरल्यानंतर दुपारी १२ वाजेपर्यंत अर्ज सादर करण्याच्या मुदतीत नगरसेवक प्रमोद नेमाडे यांनी अर्ज सादर केल्याने त्यांची निवडणूक अधिकारी तथा तहसीलदार दीपक धीवरे यांनी बिनविरोध निवड करण्यात आली. यावेळी मुख्याधिकारी संदीप चिद्रवार व नगराध्यक्ष रमण भोळे उपस्थित होते.
माजी मंत्री एकनाथराव खडसे हे भाजपात असताना उपनगराध्यक्ष पदासाठी ठरल्याप्रमाणे प्रत्येकी दोन महिन्यांचा कार्यकाळ नगरसेवकांसाठी निश्‍चित करण्यात आला असला तरी माजी मंत्री एकनाथराव खडसेंनी भाजपाला रामराम ठोकत राष्ट्रवादीत प्रवेश केल्यानंतर पालिकेतील राजकीय गणितेही बदलली. आधी समर्थक युवराज लोणारी, लक्ष्मी मकासरे, शेख सईदा शफी, रमेश नागराणी या चौघांना संधी मिळाली असली तरी केवळ युवराज लोणारी या आमदार समर्थकांव्यतिरीक्त नंतरच्या काळात सत्ताधारी भाजपातील मात्र आमदार समर्थकांपैकी कुणालाही उपनगराध्यक्ष पदावर संधी मिळाली नाही.
