जळगाव : वीजबिल अधिक का आले म्हणून जाब विचारण्यास आलेल्या एका विकृत मानसिकतेच्या तरुणाने एका ३४ वर्षीय महिला वीज कर्मचारी श्रीमती रिंकू बनसोडे यांची कोयत्याने वार करुन हत्या केल्याची घटना मोरगाव (ता. बारामती) येथे बुधवारी सकाळी ११.१५ वाजेच्या सुमारास घडली. या घटनेची जळगाव परिमंडलातील सर्व अधिकारी-कर्मचारी आणि कर्मचाऱ्यांच्या संघटनांनी निषेध सभा घेवून निंदा करीत करीत मयत कर्मचारी रिंकू बनसोडे यांना श्रद्धाजंली वाहिली.
बुधवारी (दि. २४) सकाळी ११.१५ च्या सुमारास रिंकू बनसोडे या एकट्याच कार्यालयात उपस्थित होत्या. दरम्यान अभिजीत पोटे या व्यक्तीने रिंकू यांना बील जास्त आल्याचा जाब विचारला आणि एकामागोमाग एक असे जवळपास १६ वार रिंकू यांच्या हातापायावर तोंडावर केले. काही कळायच्या आतच रिंकू रक्ताच्या थारोळ्यात पडल्या. मोरगाव येथे प्रथमोपचार केल्यावर त्यांना तातडीने पुण्यातील सह्याद्री हॉस्पीटल मध्ये उपचारासाठी दाखल केले. परंतु दुर्दैवाने उपचारा दरम्यान त्यांचे दुपारी ३ वाजेच्या सुमारास प्राणज्योत मालवली. रिंकू बनसोडे यांच्या मृत्यूने महावितरणमधील कर्मचाऱ्यांवर शोककळा पसरली आहे. या घटनेचा कर्मचाऱ्यांसह सर्वच स्तरातून निषेध नोंदवला जात आहे.
किरकोळ बिलासाठी हल्ला
ज्याने हल्ला केला त्या आरोपीचे वीजबिल रत्नाबाई सोपान पोटे या नावाने आहे. एप्रिल २०२४ या महिन्याचे ६३ युनीट वीजवापराचे वीजबिल ५७० रुपये इतके आहे. मागील १२ महिन्याचा वापर तपासला असता तो ४० ते ७० युनीटमध्ये आहे. थकबाकी नाही. उन्हाचा तडाखा वाढल्यामुळे चालू महिन्यात वापर ३० युनीटने वाढला व त्याचे बील ५७० आले होते. हे बील वापरानुसार व नवीन दरानुसार योग्यच आहे. तसेच सदर ग्राहकाची वीजबिलाबाबत कोणतीही लेखी अथवा ऑनलाईन तक्रार नोंदवलेली नाही.
दरम्यान रिंकू बनसोडे यांच्या हत्येचे पडसाद संपूर्ण राज्यात उमटत असून महावितरणच्या जळगाव परिमंडलातही वीज कर्मचाऱ्यांनी व कर्मचाऱ्यांच्या विविध संघटनांनी एकञ येत घटनेचा निषेध व्यक्त केला. घटनेतील आरोपीस कठोर शिक्षा व्हावी त्यासाठी फास्टट्रॅक कोर्टात हे प्रकरण चालविण्यात यावे. अशीही मागणी या निषेध सभेत करण्यात येवून रिंकू बनसोडे यांना श्रध्दाजंली वाहाण्यात आली. जळगावच्या निषेध सभेत महावितरणचे सर्व अधिकारी-कर्मचारी, विविध कर्मचारी संघटनांचे प्रतिनिधी मोठ्या संख्येने उपस्थित होते.
