जळगाव (प्रतिनिधी) यंदा भाद्रपद गणेश चतुर्थी उत्सव ३१ ऑगस्टपासून सुरू होणार आहे. या दिवशी लोक आपल्या घरात गणपतीची स्थापना करतात. तुम्हीही गणपती बाप्पाला या चतुर्थीला घरात आणण्याचा विचार करत असाल तर जाणून घ्या बाप्पाच्या स्थापनेचा शुभ मुहूर्त आणि इतर महत्वपूर्ण गोष्टी. यंदा गणरायाचा मुक्काम दहा दिवसांचा असणार आहे. बुधवारी सकाळी ११.०५ वाजेपासून ते रात्र १२ वाजेपर्यंत बाप्पाची स्थापना करता येणार आहे.
बुधवार ३१ ऑगस्ट गणपती स्थापना करण्यासाठी शुभ मुहूर्त चौघडिया –
सकाळी ०६ वाजून २५ मिनिटे ते ०७ वाजून ५९ मिनिटापर्यंत
सकाळी ०७ वाजून ५९ मिनिटे ते ०९ वाजून ३३ मिनिटापर्यंत
सकाळी ११ वाजून ०७ मिनिटे ते १२ वाजून ४१ मिनिटे
बाप्पाचा घरात प्रवेश कसा करावा
गणेशाच्या आगमनापूर्वी घर आणि दरवाजा सजवावे आणि ते जिथे गणपतीची स्थापना करायची असेल ती जागा स्वच्छ करून पूजेसाठी तयार करावी. गणपती आणण्यासाठी जाण्यापूर्वी नवीन वस्त्र धारण करावे, डोक्यावर टोपी किंवा साफा घालावा. पितळ किंवा चांदीचं ताम्हण सोबत न्यावं. लाकडी पाट देखील सोबत घेऊन जाऊ शकता. त्यावर गणेशाची मूर्ती विराजित करुन घरात प्रवेश करावं. सोबत घंटा किंवा इतर वाद्य यंत्र घेऊन जावे. मूर्ती वाजत-गाजत आणावी आणि घरात प्रवेश करण्यापूर्वी दारावर आरती ओवाळावी. मंगल गीत तसंच मंत्रांचे उच्चारण करावे.
‘श्री’ची स्थापना कशी करावी
गणपतीची मूर्ती स्थापित करण्यापूर्वी ईशान कोपरा स्वच्छ करुन कुंकुाने स्वस्तिक तयार करावे. हळदीने चार ठिपके काढावे. नंतर अक्षता ठेवून त्यावर चौरंग किंवा पाट ठेवावे. त्यावर लाल, पिवळा, किंवा केशरी रंगाचं आसान घालावं. त्याला चारी बाजूने फुलं आणि आंब्याच्या पानांनी सजवावं आणि पाटासमोर रांगोळी काढावी. तांब्याच्या कळशात पाणी भरुन त्यावर नारळ ठेवावं. जवळपास सुवासिक उदबत्ती, आरतीची थाळ, आरती पुस्तक, प्रसाद सर्व वस्तूं ठेवून घ्यावं. आता कुटुंबातील सदस्यांनी एकत्र येऊन ॐ गंगणपते नम: चा उच्चारण करत मूर्तीला पाटावर विराजित करावं. आता विधीपूर्वक पूजा करुन आरती करावी.
