नागपूर (वृत्तसंस्था) एका शेतकऱ्याकडून २ हजार रुपयांची लाच घेणाऱ्या महिला तलाठ्यासह कोतवालाला लाचलुचपत प्रतिबंधक विभागाने अटक केली. ही कारवाई बुधवारी दुपारी मौदा तालुक्यातील चाचेर तलाठी कार्यालयात केली. सुनीता नेमीचंद घाटे (५४, रा. संमती भवन, जैन मंदिराजवळ, इतवारी, नागपूर), असे लाचखोर तलाठी महिलेचे, तर किशोर किसन वानखेडे (५४, रा. वॉर्ड क्रमांक ४, चाचेर), असे संशयित आरोपी कोतवालाचे नाव आहे.
चाचेर येथील एका शेतकऱ्याच्या वडिलांचे काही दिवसांपूर्वी निधन झाले. वडिलांच्या मृत्यूपत्रानुसार वडिलोपार्जित शेतीचे सातबारावर फेरफार नोंद करून नाव समाविष्ट करायचे होते. ते मौदा तालुक्यातील चाचेर तलाठी कार्यालयात गेले. तेथे तलाठी सुनीता घाटे यांनी ३ हजार रुपयांची लाच मागितली तडजोडीअंती दोन हजार रुपयांची लाच देण्याचे ठरले. ती लाच कोतवाल किशोर वानखडे याच्याकडे देण्याचे ठरले.
शेतकऱ्याने एसीबीचे अधीक्षक राहुल माकणीकर, अप्पर अधीक्षक संजय पुरंदरे यांच्याकडे तक्रार केली. त्यानुसार, बुधवारी दुपारी सापळा रचण्यात आला. दोन हजार रुपयांची लाच कोतवालाने घेऊन तलाठी सुनीत घाटे हिच्याकडे दिली. त्याचवेळी दबा धरून बसलेल्या पोलिसांनी दोघांनाही ताब्यात घेतले. त्यांच्याकडून लाचेची रक्कम जप्त केली.
