पुणे (वृत्तसंस्था) अखेर कसबा विधानसभा पोटनिवडणुकीसाठी काँग्रेसनेही आपला उमेदवार जाहीर केला आहे. काँग्रेसने कसब्यातून रवींद्र धंगेकर यांना उमेदवारी जाहीर केलीय. काँग्रेसचे प्रदेशाध्यक्ष नाना पटोले यांनी ट्विट करत उमेदवारीची घोषणा केली आहे. (Kasba ByPoll Election) तर कुलकर्णी, टिळकांचा मतदारसंघ गेला, आता नंबर बापटांचा?, अशा आशयाची बॅनर शहरात लागल्यामुळे भाजापाचे टेन्शन वाढले आहे.
एकत्रित जोर लावल्यास भाजपला नक्की धक्का बसेल !
आता भाजपचे हेमंत रासने विरुद्ध काँग्रेसचे रवींद्र धंगेकर असा सामना कसब्यातून पाहायला मिळणार आहे. तर दुसरीकडे कुलकर्णी, टिळकांचा मतदारसंघ गेला, आता नंबर बापटांचा, अशा आशयाचे मजकूर असलेले बॅनर कसब्यात लागले आहेत. यावरून भाजपच्या खेळीमुळे ब्राह्मण समाज नाराज झाल्याचे स्पष्ट आहे. तर कसबा पोटनिवडणुकीत (Kasba Bypoll Election) मविआने (Mahavikasaghadi) एकत्रित जोर लावल्यास भाजपला नक्की धक्का बसेल असं काँग्रेस नेते रोहित टिळक (Rohit Tilak) यांनी म्हटलंय. रोहित टिळक यांची आज मविआचे उमेदवार रविंद्र धंगेकर (Ravindra Dhangekar) यांनी भेट घेतली. ब्राह्मण समाजाच्या नाराजीचा मोठा फटका भाजपला बसेल असं टिळक यांनी म्हटलंय.
रवींद्र धंगेकर वरिष्ठाच्या उपस्थितीत आज भरणार उमेदवारी अर्ज !
पुणे जिल्ह्यातील कसबा मतदार संघात विधानसभेची पोटनिवडणूक महाविकास आघाडीचे सर्व घटक पक्ष एकत्रित लढणार आहेत. कसबा मतदारसंघाची जागा कॉंग्रेस पक्ष लढवणार असल्याचा निर्णय झाला असून येथून रवींद्र हेमराज धंगेकर यांना उमेदवारी जाहीर करण्यात येत आहे, असं त्यांनी ट्वीटमध्ये लिहिलं आहे. तर रवींद्र धंगेकर यांनी आपल्याला उमेदवारी दिल्याचं कालच नाना पटोले यांनी फोनवरून सांगितल्याची प्रतिक्रिया व्यक्त केली होती. काल रात्री नाना पटोलेंचा मला फोन आला. यावेळी त्यांनी तयारी करा, फॉर्म भरा असे आदेश दिले. त्यामुळे मी आज वरिष्ठाच्या उपस्थितीत उमेदवारी अर्ज भरणार आहे, असं धंगेकर यांनी सांगितलं.
काय मजकूर आहे बॅनरवर?
या बॅनरवर पिंपरी आणि कसबा पोटनिवडणुकांच्या पार्श्वभूमीवर कोथरूड आणि आता कसबा या दोन मतदारसंघांमधील भाजपाच्या उमेदवारीचा उल्लेख केल्याचं सूचित होत आहे. “कुलकर्णींचा मतदारसंघ गेला…टिळकांचा मतदारसंघ गेला.. आता नंबर बापटांचा का???… समाज कुठवर सहन करणार?” असा प्रश्न या बॅनरवर उपस्थित करण्यात आला आहे.
