अमळनेर (प्रतिनिधी) भारतीय जनता युवा मोर्चा महाराष्ट्र प्रदेश यांच्या वतीने युवा वॉरियर्स या उपक्रमाचा शुभारंभ १९ फेब्रुवारी रोजी शिवजयंतीच्या पवित्र दिवशी किल्ले सिंहगड, पुणे येथून होणार आहे. या उपक्रमाअंतर्गत भाजयुमोच्या माध्यमातून महाराष्ट्रभरातील विविध क्षेत्रात आवड असणाऱ्या युवांना जोडून त्यांच्यासाठी त्यांना रुची असणारे विविध उपक्रम राबविण्यात येणार आहेत.
सशक्त भारताच्या निर्माणासाठी युवांचे योगदान फारच महत्त्वाचे आहे. आपल्या देशातील युवा हा फार प्रगल्भ आहे, त्यामुळे प्रत्येकाने आपल्या आवडीच्या क्षेत्रात दैदिप्यमान कामगिरी केल्यास त्याचा उपयोग आपल्या देशाचे भवितव्य उज्ज्वल होण्यासाठी होऊ शकतो. अशा विविध क्षेत्रातील युवांनी या लोकशाहीच्या प्रक्रियेचा भाग व्हावे आणि देशाची लोकशाही अधिक मजबूत करण्यासाठी प्रयत्न करावे या हेतूने भाजयुमोतर्फे हा उपक्रम राबविण्यात येत आहे. हा उपक्रम महाराष्ट्राचे माजी मुख्यमंत्री देवेंद्र फडणवीस व भाजपा प्रदेशाध्यक्ष चंद्रकांत पाटील यांच्या मार्गदर्शनाखाली भारतीय जनता युवा मोर्चा राबविणार असून या उपक्रमांतर्गत भारतीय जनता युवा मोर्चाचे प्रदेशाध्यक्ष विक्रांत पाटील त्यांच्या प्रदेशातील सहकाऱ्यांसह राज्यभर युवा वॉरियरच्या शाखांचे निर्माण करणार आहेत. ग्रामीण भागात प्रत्येक पंचायत समिती गणापर्यंत व शहरी भागात वॉर्ड स्तरापर्यंत शाखांचे निर्माण करण्यात येणार आहे. हे तयार झालेले युवा वॉरियर्स पुढे विविध क्षेत्रातील सातत्यपूर्ण उपक्रम करून युवांना जोडण्यासाठी प्रयत्न करणार आहेत. या विषयाचे नियोजन युवा वॉरियर्स राज्य संयोजक अनुप मोरे हे पाहत आहेत.
या पार्श्वभूमीवर जळगाव जिल्हा तही राज्याचे नेते तथा माजी मंत्री गिरिश महाजन साहेब, खासदार उन्मेषदादा पाटील, खासदार रक्षाताई खडसे, जळगाव ग्रामीणचे जिल्हाध्यक्ष तथा आमदार राजुमामा भोळे, चाळीसगावचे आमदार मंगेश चव्हाण, भुसावळचे आमदार संजय सावकारे यांच्या अध्यक्षतेखाली विविध शाखांचे उद्घाटन होणार आहे. यावेळी भाजप व भाजयुमो जळगाव ग्रामीणचे सर्व पदाधिकारी व कार्यकर्त्यांनी उपस्थित राहावे असे आवाहन भाजयुमोचे प्रदेश सचिव अनिकेत विजय पाटील यांनी केले आहे.
