मुंबई (वृत्तसंस्था) ओबीसी आरक्षण, मराठा आरक्षण आणि मुस्लीम आरक्षण या सर्व प्रकरणावरून राज्यातील वातावरण तापलं आहे. अशातच आता राष्ट्रीय समाज पक्षाचे अध्यक्ष महादेव जानकर यांनी मोठं वक्तव्य केलं आहे. ओबीसी आरक्षणावरुन आमच्या पक्षाचे ३०-३५ आमदार होऊ द्या. ओबीसींची १० मिनीटात गंमत करून दाखवतो. त्याचबरोबर मराठ्यांना आणि मुस्लिमांना देखील आरक्षण देऊन दाखवतो, असे वक्तव्य त्यांनी केले आहे.
परभणी जिल्ह्यातल्या गंगाखेडमध्ये एका कार्यक्रमात बोलताना महादेव जानकर यांनी हे वक्तव्य केले आहे. “सामान्य लोकांना न्याय देण्याची आमची भूमिका आहे. आमचे ३०-३५ आमदार होऊ द्या. दहा मिनिटांत ओबीसींची गंमत करुन टाकतो. मराठ्यांना पण आरक्षण देऊ शकतो आणि मुस्लिमांनाही आरक्षण देतो. मुसलमानावर तर किती अन्याय आहे. गॅरेज बघितलं का मुसलमान, आंब्याचं दुकान बघितलं का मुसलमान, कोंबडीचं दुकान बघितलं की मुसलमान, त्याचा कुठं कलेक्टर नाय, काय नाय, बोंबा बोंब, टोपी घालून केळं विकतंय, फळं विकतंय अन् त्या मुसलमानाला लोक शिवा देतेत, हिंदू बी भिकारी अन् मुसलमान बी भिकारी, अन राज्य चालवणारा तिसराच मालक असतो ही गोष्ट लक्षात ठेवली पाहिजे,” असं महादेव जानकर यावेळी म्हणाले.
यावेळी बोलताना त्यांनी छत्रपती शिवाजी महाराजही ओबीसी होते असेही म्हटले आहे. “मराठा समाजाला माझा विनंती आहे. शाहू महाराजांनी या पहिलं देशात आरक्षण दिलं. मराठ्यांना आरक्षण होतं, पण नंतर आरक्षण का गेलं? शिवाजी राजादेखील ओबीसी होता. कुळवाडी भूषण राजा होता. आमच्यातल्या तथाकथित लोकांना वाटलं, आम्ही लय मोठं हाय गावचं, आम्हाला नको तसलं आरक्षण आणि आज अवस्था काय झाली आहे?”असे महादेव जानकर म्हणाले.
