जळगाव (प्रतिनिधी) शहरातील व्यावसायिक राजा मयूर यांच्या घराबाहेरील सुरक्षा रक्षकांसह स्वतः राजा मयुर यांना गुंगीचे औषध देऊन घरात दरोडा टाकण्यात आल्याची खळबळजनक घटना शुक्रवारी पहाटे २.३० वाजेच्या सुमारास घडली. दरम्यान, राजा मयुर यांच्या पत्नीला जाग आल्याने त्यांना जीवे ठार मारण्याची धमकी देवून एका खोलीत कोंडून मुद्देमाल घेवून चोरटे पसार झाले.
सरबतमधून पाजले गुंगीचे औषध !
छत्रपती शिवाजी महाराज नगरातील दुध फेडरेशन रस्त्यालगत राजेंद्र अनिल मयुर उर्फ राजा मयुर (वय ८४) हे पत्नी शैला मयुर यांच्यासह वास्तव्याला आहेत. तर त्यांची मुलं ही पुण्याला वास्तव्यास आहेत. राजा मयूर यांच्याकडे तीन सुरक्षा रक्षक आहेत. त्यापैकी दोन सुरक्षा रक्षक हे गेल्या ८ वर्षांपासून त्यांच्याकडे कामाला आहेत. तर चार महिन्यांपुर्वीच विकास नेपाळी नामक सुरक्षा रक्षकाला नेमण्यात आले होते. या विकास नेपाळीने रात्री १०.३० वाजता आपल्या भावाला मुलगा झाल्याचे सांगून घराबाहेर ड्यूटीवर असलेले सुरक्षा रक्षक उदय समेळ व वसंत श्रीखंडे या दोघांना सरबत पाजले. तसेच राजा मयूर यांनाही तेच कारण सांगत, त्याने सरबत पाजले. या सरबतमध्येच गुंगींचे औषध टाकण्यात आले होते. त्यामुळे काही वेळेतच
सुरक्षा रक्षकाने साथीदारासह घरात दरोडा टाकला !
राजा मयुर यांच्यासह दोघं सुरक्षा रक्षक बेशुध्द झाले व राजा मयुर यांची पत्नी आधीच झोपून गेलेली होती. त्यामुळे त्यांना गुंगीचे औषध देण्याचा प्रयत्न विकास नेपाळीचा यशस्वी होऊ शकलेला नव्हता, तिघे बेशुध्द झाल्यानंतर विकास नेपाळीने त्याच्या साथीदारासह घरात दरोडा टाकला. घरातील सोन्याचे दागिने, रोख रक्कम, दोन मोबाईल फोन असा लाखो रुपयांचा ऐवज चोरी करत असतांना घरात झोपलेल्या शैला मयुर यांना जाग आली. त्यांनी कोण आहे कोण आहे, असा आवाज द्यायला सुरुवात करताच दरोडेचोरांनी त्यांच्या गळ्याला स्क्रू ड्रायव्हरचे टोक लावून आरडाओरड केली तर जीवे ठार मारू अशी धमकी दिली. तसेच दरोडेखोरांनी त्यांना एका खोलीत बंद करून सर्व मौल्यवान वस्तू घेवून पलायन केले.
