पुणे (वृत्तसंस्था) एमपीएससी परीक्षा देऊन अधिकारी झालेल्या दर्शना पवार हिच्या खुनाचे गूढ उकलले असून मुख्य आरोपी तसेच दर्शनाचा मित्र राहूल हंडोरेला अटक करण्यात आली आहे. दर्शना हिचा मृतदेह सडलेल्या अवस्थेत राजगडाच्या पायथ्याशी आढळून आल्यानंतर प्रचंड खळबळ उडाली होती.
नेमकं काय घडलं होतं !
दर्शना पवारचा मृतदेह राजगड किल्ल्याच्या पायथ्याशी कुजलेल्या अवस्थेत सापडला होता. तिचा खून झाल्याचे शवविच्छेदन अहवातून स्पष्ट झाले होते. दर्शना मूळची नगर जिल्ह्यातील रहिवासी आहे. वनपरिक्षेत्र अधिकारी म्हणून तिची निवड झाली होती. किल्ल्यावर जाताना तिच्यासोबत मित्र राहुल दत्तात्रय हांडोरे सोबत होता. १२ जूननंतर तिचा मोबाइल बंद झाला. तिच्या कुटुंबीयांनी संपर्क साधला. मात्र, तिचा मोबाइल क्रमांक बंद असल्याचे लक्षात आल्यानंतर तिच्या कुटुंबीयांनी शोध घेतला. मात्र, तिचा ठावठिकाणा लागला नाही. त्यानंतर तिच्या कुटुंबीयांनी दर्शना बेपत्ता असल्याची तक्रार सिंहगड रस्ता पोलीस ठाण्यात दिली. गेल्या काही दिवसांपासून राहुल फरार होता. पोलिसांना गुंगारा देणाऱ्या राहुलला अखेर पाच दिवसानंतर मुंबईतून अटक करण्यात आली आहे.
…म्हणून केला खून !
दर्शना आणि राहुल एकमेकांचे नातेवाईक आहे. दोघे एकमेकांना अनेक वर्षांपासून ओळखत होते. दर्शनासोबत लग्न करण्याची राहुलची इच्छा होती. दोघेही एमपीएससीची परीक्षा देत होते. मात्र या प्रयत्नांमधे दर्शनाला आधी यश आले आणि तिने वन विभागाची परीक्षा उत्तीर्ण केली. त्यानंतर दर्शनाच्या घरच्यांनी तिचे लग्न दुसर्या मुलासोबत जमवले. त्यामुळे राहुल हंडोरे अस्वस्थ झाला. त्याने एमपीएससीची परीक्षा उत्तीर्ण होण्यासाठी त्याला थोडा वेळ द्यावा. तो देखील परीक्षा उत्तीर्ण होऊन अधिकारी बनेल असे दर्शना आणि तीच्या कुटुंबियांना सांगून पाहिले. मात्र त्याला प्रतिसाद मिळत नसल्याने राहुलने राजगडाच्या पायथ्याशी दर्शनाची हत्या केल्याची प्राथमिक माहिती समोर आली आहे. दरम्यान, त्याने माझ्या बहिणीचा घात केला आहे. त्या आरोपीला आमच्या ताब्यात द्या. अन्यथा मारून टाका, अशी संतप्त प्रतिक्रिया दर्शना पवारच्या भावाने दिली आहे. दर्शनाच्या हत्येने तिचे कुटुंबीयांनवर दुःखाचा डोंगर कोसळला आहे.
