जळगाव (प्रतिनिधी) परीक्षेची धडपड, मुलीचे उज्ज्वल भविष्य आणि बापाचं मोलाचं साथ…पण नियतीला काहीतरी वेगळंच मंजूर होते. जळगावच्या महेश सोनार यांचं स्वप्न होतं मुलीला एमबीए बनवायचे. आज त्यांनी आपल्या मुलीला नयना हिला अमळनेरला सीईटी परीक्षा देण्यासाठी स्वतः गाडी चालवत नेलं. परीक्षा झाल्यावर परत येताना, पिंप्री गावाजवळ भरधाव बोलेरो पिकअपने त्यांच्या कारला जोरदार धडक दिली आणि क्षणात साऱ्या आयुष्याला हादरा बसला.
या भीषण अपघातात महेश सोनार यांचा जागीच मृत्यू झाला. मुलगी नयना आणि मित्र राजेश धूत गंभीर जखमी आहेत. समोरच्या बोलेरोत लग्नाच्या वऱ्हाडातील काही जणही जखमी झाले आहेत. एका बापाचं स्वप्न पूर्ण व्हायच्या क्षणीच त्याचं आयुष्य संपलं आणि मुलीच्या शिक्षणाच्या वाटेवर दुःखाचं खोल गडद सावट पसरलं. तर हळदीच्या कार्यक्रमासाठी निघालेल्या वऱ्हाडाची गाडीला अपघातात अनेक जण जखमी झाल्यामुळे आनंदाच्या क्षणी दुःखाला सामोरे जावे लागले आहे.
ही दुर्दैवी घटना पिंप्री गावाजवळ घडली. जखमींना तातडीने जळगाव शासकीय वैद्यकीय महाविद्यालयात दाखल करण्यात आले आहे. रुग्णालयात नातेवाईकांनी एकच आक्रोश केल्याचे हृदयद्रावक दृश्य पाहायला मिळाले. या अपघातात महेश सुरेश सोनार (वय ५५, रा. रामेश्वर कॉलनी, जळगाव) यांचा मृत्यू झाला आहे. महेश सोनार हे रामेश्वर कॉलनीत पत्नी आणि दोन मुलींसोबत राहत होते आणि पाण्याचे जार वाटपाचा व्यवसाय करून आपला उदरनिर्वाह चालवत होते.
याबाबत अधिक माहिती अशी की, आज अमळनेर येथे त्यांची मुलगी नैनाची एमबीएच-सीईटीची परीक्षा होती. त्यामुळे ते आपली मुलगी नयना आणि राजेश मिठूलाल धूत (वय ४६) यांच्यासोबत कारने अमळनेरला गेले होते. परीक्षा संपवून ते दोघे मुलीसह जळगावकडे परत येत असताना, दुपारी दीड वाजेच्या सुमारास पिंप्री गावाजवळ त्यांच्या कारला समोरून आलेल्या एका बोलेरो पिकअप वाहनाने जबर धडक दिली.
खासदारांनी साधला माजी नगरसेवकशी संपर्क
याच रस्त्यावरून खासदार स्मिताताई वाघ हे अमळनेरकडे जात असतांना त्यांना अपघात झाल्याचे दिसून आले. कारमधील सर्वजण जळगावातील रामेश्वर कॉलनीतील असल्याचे समजल्यानंतर त्यांनी त्या परिसरातील माजी नगरसेवक राजेंद्र घुगे पाटील यांच्याशी संपर्क साधून माहिती दिली. त्यानुसार मयतांच्या नातेवाईकांना अपघात झाल्याची माहिती देण्यात आले. जखमींना जळगावच्या शासकीय वैद्यकीय महाविद्यालयात उपचारासाठी दाखल करण्यात आले. रुग्णालयात पोहोचताच नातेवाईकांनी एकच आक्रोश केला, ज्यामुळे वातावरण अधिक शोकाकुल झाले होते.
हळदीचा कार्यक्रमाला जाणारे वऱ्हाडी जखमी
मात्र, याचवेळी समोरून येणाऱ्या बोलेरो पिकअपमध्ये लग्नाचे वऱ्हाड होते. आज सायंकाळी हळदीचा कार्यक्रम असल्याने वऱ्हाडी मंडळी त्या वाहनातून प्रवास करत होती. या अपघातात बोलेरोमधील काही जणही जखमी झाले असून, त्यांना धरणगाव येथील ग्रामीण रुग्णालयात दाखल करण्यात आले आहे.
