मुंबई (वृत्तसंस्था) कोरोना संक्रमनाच्या दृष्टीने महाराष्ट्रासाठी पुढील ४८ तास खूप महत्वाचे आहेत. त्यामुळे राज्यात कुठल्याही क्षणी संपूर्ण लॉकडाऊनची घोषणा होऊ शकते, अशी माहिती मंत्रालयातील अत्यंत वरिष्ठ आणि विश्वसनीय सूत्रांनी दिली आहे.
काल जनतेला संबोधित केल्यानंतर, मुख्यमंत्री उद्धव ठाकरे यांनी आज विविध क्षेत्रातील मान्यवरांशी चर्चा करून त्यांची मतं जाणून घेतली. संपूर्ण लॉकडाऊन न करता, वाढती रुग्णसंख्या रोखता येईल का, यादृष्टीने विचारविनिमय करण्यात आला. टेस्टिंग सेंटर्स, बेड्स, हॉस्पिटल्स, ऑक्सिजन पुरवठा या सुविधा वाढवणं प्रशासनाने वर्षभरात वाढवल्या आहेत, त्या आणखीही वाढवता येतील. मात्र, रुग्णसंख्येला पुरे पडू शकतील एवढे डॉक्टर-नर्सेस कुठून उपलब्ध होतील, हा प्रश्न अनुत्तरित आहे. त्यामुळे लॉकडाऊनशिवाय कुठलाही पर्याय राज्य सरकारसमोर नाही.
राज्यात कोरोनाचा हाहाकार सुरू असताना रुग्णसंख्येची वाढ अशीच कायम राहिली तर येत्या १० ते १५ दिवसांत सर्व बेड्स आणि संसाधनं अपुरी पडू लागतील, असं स्पष्ट शब्दांत मुख्यमंत्र्यांनी काल जाहीर केलं होतं. “राज्यात लसीकरण मोहिम मोठ्या पातळीवर सुरू आहे. आपण आरोग्य सेवांमध्येही वाढ करत आहोत. पण कोरोनाची साखळी नेमकी तोडायची कशी? यावर अद्याप लॉकडाऊनशिवाय इतर दुसरा कोणताच उपाय नाही. लॉकडाऊन आज जाहीर करत नसलो, तरी इशारा देतोय. दोन दिवसांत याबाबतचा निर्णय आणि निमावली जाहीर केली जाईल”, असंही मुख्यमंत्री म्हणाले होते.
राज्यातील बहुतेक जिल्ह्यांमध्ये याआधीच जिल्हापातळीवर लॉकडाऊन संदर्भातील कडक नियम लागू करण्यात आले आहेत. पुण्यात आजपासून अंशत: लॉकडाऊन करण्यात आला आहे. तर बीड, अमरावती, बुलढाणा, सोलापूरमध्येही कडक नियमांची तर काही ठिकाणी विकेंड लॉकडाऊनची अंमलबजावणी करण्यात आली आहे. त्यामुळे कडक निर्बंध लादूनही कोरोना रुग्णसंख्या आटोक्यात येत नसल्याचं चित्र दिसून आल्यानं आता अधिकृतरित्या संपूर्ण महाराष्ट्रात लॉकडाऊन करण्याशिवाय सरकारसमोर पर्याय उरलेला नसल्याचं सांगितलं जात आहे.
मुख्यमंत्री म्हणाले की, काही लोक लस घेतल्यानंतरही संसर्गित होत आहेत कारण ते मास्क घालत नाही. कोरोनाच्या नियमांचे पालन केले पाहिजे. मुख्यमंत्री म्हणाले की, येत्या काही दिवसात राज्यात दररोज अडीच लाख RT-PCR चाचण्या घेण्याचे उद्दीष्ट आहे. ते पुढे म्हणाले कि, ‘राज्य सरकारला गरिबांचे जीवनमान आणि अर्थव्यवस्था वाचवायची आहे, पण आम्हाला लोकांचे प्राणही वाचवायचे आहेत.’ मुख्यमंत्र्यांनी राजकीय पक्षांनाही आवाहन केले आहे कि या साथीच्या परिस्थितीवर राजकारण करू नये.
दरम्यान, आताच मिळालेल्या माहितीनुसार महाराष्ट्रात कुठल्याही क्षणी संपूर्ण लॉकडाऊन होऊ शकतो. सरकारचा निर्णय झाल्यात जमा असल्याचं वृत्त आहे. मात्र, अद्याप कुठलीही अधिकृत घोषणा झालेली नाही. कोरोना रूग्ण वाढल्यास डॉक्टर, नर्सेस आणि आरोग्य सेवक कोठून आणाचे या महत्वाच्या प्रश्नाचं ठोस उत्तर मिळत नसल्यानं राज्यात कुठल्याही क्षणी संपूर्ण लॉकडाऊनची घोषण होऊ शकते असं मंत्रालयातील सूत्रांनी सांगितलं आहे.
