जळगाव (प्रतिनिधी) गिरीश महाजन यांना मी आवाहन करतो की, मी कमवलेली प्रॉपर्टी जर बेहिशोबी असेल तर तुम्हाला मी दान करून टाकेल. या उलट बीएचआर घोटाळ्यातून तुम्ही १० कोटींची जमीन खरेदी केली आहे. माझ्याकडे उतारे आहेत, असा खळबळजनक आरोप राष्ट्रवादीचे नेते एकनाथराव खडसे यांनी केला आहे. खडसे आणि गिरीश महाजन यांच्यात गेल्या दोन दिवसांपासून आरोप-प्रत्यारोप सुरु आहेत.
खडसे पुढे म्हणाले की, नाथाभाऊला महाराष्ट्रात बदनाम करण्याचं षडयंत्र सुरू आहे. पण नाथाभाऊ त्यांना भारी आहे. मी तुमचा बीएचआर घोटाळा बाहेर काढला. त्यामुळेच यांचा जीव धकधक करत आहे. गरीबांच्या ठेवींवर यांनी दरोडे घातले आहेत, असा त्यांनी चढवला. ईडीचा विषय आता संपला आहे. कोर्टात माझ्याविषयीची चार्जशीट दाखल झाली आहे. त्यामुळे मी ईडीला घाबरत नाही. मी फक्त कोर्टाला घाबरतो, असं ते म्हणाले.
मुलीच्या पराभवामागे गिरीश महाजनच
माझ्या मुलीच्या पराभवामागे गिरीश महाजनच असल्याचं मला कालच समजलं, असा आरोप करून खडसे यांनी एकच खळबळ उडवून दिली आहे. एकनाथराव खडसे यांनी महाजन यांच्यावर नवा आरोप केला आहे. खडसे म्हणाले की, माझ्या मुलीच्या पराभवामागे गिरीश महाजनच आहे. हे मला कालच समजलं, असं सांगतानाच मी भाजपमध्ये असलेल्यांना सांगतो की, अरे भाजपवाल्यांनी माझे असे हाल केले. तुम्ही काय त्यांची हाजीहाजी करता. राष्ट्रवादीत या, असं आवाहन खडसे यांनी भाजपमधील नेत्यांना केलं. तसेच मी चाळीस वर्ष जीवाची पर्वा न करता भाजपमध्ये काम केलं. त्याच गद्दारांनी माझ्यावर अन्याय केला. हे गद्दार कोण आहेत हे एकदा गुगलवर सर्च करून पाहा. टरबूज असं सर्च करून पाहा, मग कळेल गद्दार कोण?, अशी टीका त्यांनी फडणवीसांचं नाव न घेता केली. तसेच राष्ट्रवादीत आल्यानंतरच मला भाजपमधील नीच आणि गद्दार कोण हे समजलं आहे. याबाबतचे वृत्त टीव्ही ९ ने प्रसिद्ध केले आहे.
