मुंबई (वृत्तसंस्था) NIA ने नुकताच मुंबईत एक छापा टाकला असून अंडरवर्ल्ड डॉन दाऊद इब्राहिम याच्याशी संबंधीत असलेल्या मुंबईतील दोन तरुणांना ताब्यात घेतले आहे. छोटा शकील याच्यासोबत व्यवहार केल्याच्या प्रकरणात एनआयएने दोघांना अटक केली असून आरिफ अबू बकर शेख आणि शकील अबू बकर शेख उर्फ शब्बीर अशी त्यांची नावे आहेत.
मिळालेल्या माहितीनुसार, आरिफ अबू बकर शेख आणि शकील अबू बकर शेख उर्फ शब्बीर हे दोघेही मुंबईतील ओशिवरा परिसरात वास्तव्यास आहेत. दाऊद इब्राहिमचा हस्तक छोटा शकील आणि अटक करण्यात आलेल्या या दोघांमध्ये आर्थिक व्यवहार झाले होते. त्याच प्रकरणात एनआयएने चौकशी केली आणि त्यानंतर या दोघांनाही अटक केली आहे. अटक करण्यात आलेल्या या दोन्ही आरोपींना एनआयएची टीम आज कोर्टात हजर करणार आहे. हे दोन्ही आरोपी दाऊद इब्राहिमच्या डी गँगसाठी टेर फंडींगसाठी मुंबईतून पैसे जमा करत असल्याचा आरोप आहे. या दोघांमध्ये आणि छोटा शकील याच्यात महिनाभरापूर्वी आर्थिक व्यवहार झाले असल्याची माहिती सूत्रांकडून मिळत आहे.
एनआयएच्या टीमने मुंबई आणि उपनगरात एकूण 29 ठिकाणी छापेमारी केली होती. 9 मे रोजी करण्यात आलेल्या या छापेमारी दरम्यान 21 वेगवेगळ्या लोकांच्या निवासस्थानावर आणि कार्यालयावर छापे टाकण्यात आले. एनआयएचे पथक गेल्या ४ दिवसांपासून मुंबईतील एनआयए मुख्यालयात सुमारे 13 जणांची चौकशी करत होते. त्यानंतर आता छोटा शकीलच्या दोन हस्तकांना बेड्या ठोकल्या आहेत.
