जळगाव (प्रतिनिधी) महाराष्ट्र शासनाच्या अवयवदान जनजागृती मोहिमेची ब्रँड अँबेसिडर राहिलेल्या मराठमोळ्या युवतीचा ज्येष्ठ मंत्री ना. गिरीश महाजन यांच्यासोबतचा कथित बनावट फोटो तयार करून समाजमाध्यमांवर व्हायरल करत बदनामी केल्याप्रकरणी अटक करण्यात आलेल्या आरोपीसह त्याला मदत करणाऱ्या सर्व संबंधितांवर कठोर कारवाई करण्याची मागणी छत्रपती शिवाजी ब्रिगेडने केली आहे. यासंदर्भात राज्य महिला आयोगाच्या अध्यक्षा तसेच जळगाव जिल्हा पोलीस अधीक्षक यांना निवेदन देण्यात आले आहे.
निवेदनात म्हटले आहे की, संबंधित युवतीने आपल्या वडिलांना यकृतदान करून त्यांना नवजीवन दिले होते. तिच्या या उल्लेखनीय योगदानाची दखल घेत महाराष्ट्र शासनाने तिची अवयवदान जनजागृती मोहिमेची ब्रँड अँबेसिडर म्हणून निवड केली होती. अशा प्रतिष्ठित आणि उच्चशिक्षित युवतीचा ज्येष्ठ मंत्री गिरीश महाजन यांच्यासोबतचा कथित बनावट फोटो तयार करून समाजमाध्यमांवर प्रसारित करण्यात आल्याने तिची गंभीर बदनामी झाली असून, या प्रकारामुळे तिच्या वैयक्तिक आणि सामाजिक आयुष्यावर विपरीत परिणाम होण्याची शक्यता निर्माण झाली आहे.
या प्रकरणातील भरत बालाजी मस्के (रा. गोंदी खुर्द, ता. गेवराई, जि. बीड) याला जळगाव पोलिसांनी अटक केल्याबद्दल छत्रपती शिवाजी ब्रिगेडने पोलिसांचे अभिनंदन केले आहे. मात्र, या कटामागे इतर कोणाचा सहभाग असल्यास त्यांचाही शोध घेऊन कठोर कारवाई करावी, अशी मागणी करण्यात आली आहे.
समाजमाध्यमांचा गैरवापर करून महिलांची बदनामी करणाऱ्यांविरुद्ध कठोर कायदेशीर कारवाई व्हावी, तसेच या प्रकरणाचा सर्वंकष तपास करून दोषींना कडक शिक्षा व्हावी, अशी मागणीही निवेदनातून करण्यात आली आहे.
याशिवाय, जळगाव जिल्ह्याच्या महिला खासदारांनी या घटनेची गंभीर दखल घेऊन संसदेत समाजमाध्यमांच्या माध्यमातून महिलांची बदनामी करणाऱ्यांविरोधात अधिक कठोर कायदे करण्यासाठी केंद्र सरकारकडे पाठपुरावा करावा, असे आवाहनही छत्रपती शिवाजी ब्रिगेडच्या वतीने करण्यात आले आहे.
