चोपडा (प्रतिनिधी) – चोपडा येथे गोतस्करी प्रकरणाच्या निषेधार्थ सकल हिंदू समाज बांधवांनी तीव्र आंदोलन छेडले. आंदोलनादरम्यान संबंधित पोलिस अधिकारी, पोलिस निरीक्षक मधुकर साळवे यांना तात्काळ निलंबित करण्याची मागणी मोर्चेकऱ्यांनी केली. “कारवाईचे ठोस आश्वासन मिळाल्याशिवाय मागे हटणार नाही,” असा आक्रमक पवित्रा यावेळी घेण्यात आला. यावेळी उपविभागीय पोलिस अधिकारी व तहसीलदार यांना निवेदन सादर करण्यात आले. वरिष्ठ अधिकाऱ्यांशी संपर्क साधूनही चौकशीस वेळ लागेल, असे प्रशासनाकडून सांगण्यात आले.दरम्यान, रोहित निकम यांनी भ्रमणध्वनीवरून मंत्री गिरीश भाऊ महाजन व जिल्हा पोलिस अधीक्षक महेश्वर रेड्डी यांच्याशी संवाद साधत मोर्चेकऱ्यांशी थेट चर्चा घडवून आणली. यावेळी पाच दिवसांत चौकशी पूर्ण करून योग्य ती कारवाई करण्यात येईल, असे आश्वासन देण्यात आले. या आश्वासनानंतर आंदोलन मागे घेण्यात आले. मात्र, ठरलेल्या मुदतीत कारवाई न झाल्यास सकल हिंदू समाज पुन्हा मोठ्या संख्येने रस्त्यावर उतरेल, असा इशारा आंदोलनकर्त्यांनी दिला.
