जळगाव (प्रतिनिधी) जिल्ह्यातील अमळनेरच्या मंगळ ग्रह मंदिरात ड्रेस कोड लागू करण्यात आला आहे. तोकडे, उत्तेजक आणि असभ्य कपडे घालणाऱ्यांना या मंदिरात प्रवेश नसल्याचे फलकच मंदिराच्या प्रवेशद्वारावर लावण्यात आला आहे.
जिल्ह्यातील अमळनेर येथील मंगळग्रह सेवा संस्था संचलित श्री मंगळदेव ग्रह मंदिर संपूर्ण भारतातील अतिप्राचीन, अतिदुर्मिळ आणि अतिजागृत देवस्थान म्हणून मान्यता आहे. याच मंदिराच्या बाहेर उत्तेजक कपडे, तोकडे कपडे परिधान करून नये, अंग प्रदर्शन करून नये, भारतीय संस्कृती जपावी, असा फलक मंदिराबाहेर भाविकांसाठी लावण्यात आला आहे.
तुळजापूरच्या तुळजाभवानी मंदिरात लागू केलेला ड्रेस कोडचा निर्णय एक दिवसात मागे घ्यावा लागला होता. त्यानंतर नागपूरमधील चार मंदिरात ड्रेस कोडचा निर्णय लागू झाला होता. दरम्यान, भारतीय संस्कृती जपण्यासाठी हा नियम करण्यात आला असून मंदिरात येणाऱ्या प्रत्येक भाविकाला तो पाळावाच लागेल. तसेच कुणीही टीका केली म्हणून तो बदलण्यात येणार नाही, असे मंदिर संस्थानाचे म्हणणे आहे. दरम्यान, तोकडे कपडे घालणाऱ्यांना प्रवेशबंदी केल्यानंतर संमिश्र प्रतिक्रिया समोर येत आहेत.
