चाळीसगाव (प्रतिनिधी) भाजपचे कार्यकर्ते तथा विधानसभा क्षेत्रप्रमुख अनिल नागरे यांचे नुकतेच निधन झाले. रविवारी झालेल्या चाळीसगावचे आमदार मंगेश चव्हाण यांनी नागरे यांच्या कुटुंबियांना १० लाखांची मदत करण्यासह त्यांच्या मुलांच्या शिक्षणाची जबाबदारी घेतली. शोकसभेत नागरे यांच्या आठवणी सांगतांना आमदार गहिवरले. आमदार चव्हाण यांच्या रूपाने कार्यकत्यांना जपणारे संवेदनशील व्यक्तीमत्व म्हणून पहावयास मिळाले.
अनिल नागरे यांना श्रद्धांजली अर्पण करण्यासाठी सर्वपक्षीय शोकसभेचे आयोजन रविवारी करण्यात आले होते. या वेळी आमदार चव्हाण म्हणाले की, एखादा कार्यकर्ता घडायला मोठा कालावधी जाऊ द्यावा लागतो. मात्र त्याच्या अकाली निधनानंतर त्याचे कुटुंबच नव्हे तर तो काम करत असलेला पक्ष संघटना देखील पोरकी होते. नागरे यांनी स्वतः साठी, आपल्या परिवारासाठी काहीही न करता गावासाठी पक्षासाठी मोठे योगदान दिले.
जेव्हा परिवारातील कर्ता पुरुष अचानक निघून जातो तेव्हा त्या परिवाराची काय अवस्था होते हे आपण सर्व जाणतो. नागरे हयात असताना अनेक विषयांवर आमची मत मतांतरे असायची, मात्र त्यांच्या दोन्ही मुलांना चांगले शिक्षण मिळायला हवे यासाठी मदत करण्याचे आश्वासन दिले होते. एकरभर शेती शिवाय उत्पन्नाचे दुसरे साधन नसणाऱ्या नागरे कुटुंबाला १० लाख रुपयांची मदत तसेच त्यांच्या मुलांच्या शिक्षणासाठी वेळोवेळी मदत करण्याचे आमदार यांनी यावेळी जाहीर केले. तसेच इतरांनाही मदत करण्याचे आवाहन त्यांनी केले.
