जळगाव (प्रतिनिधी) शहरामध्ये रस्त्यांची पूर्णत: वाताहात झालेली आहे. त्यातच ऐन पावसाच्या दिवसामध्ये तर जनतेला खराब रस्त्यांमुळे नरक यातना सहन लागत आहेत. या प्रशासनाला उठविण्यासाठी आता महाराष्ट्र नवनिर्माण सेनेच्यावतीने आज सकाळी मनपा इमारतीत ‘झोपा काढा’ आंदोलन मनसे जिल्हा सचिव अॅड. जमिल देशपांडे, मनविसे जिल्हाध्यक्ष विनोद शिंदे, जिल्हा संघटक राजेंद्र निकम यांच्या नेतृत्वात करण्यात आले.
निवेदनात म्हटले आहे की, आपणांकडून आम्हांस सांगण्यात येते की, सद्यस्थितीत म.न.पा.जवळ पैसा नसल्यामुळे रस्त्यांची कामे पूर्ण होऊच शकत नाही, तसेच जी काही वसूलीची रक्कम येते ती रक्कम अमृत योजनेसाठी वापरली जाते, त्यामुळे आमचा नाईलाज झालेला आहे असे उत्तरे आयुक्त साहेबांकडून आम्हांस मिळत आहेत. महोदय, साहेब आपणांकडून अशा उत्तराची आम्हांस आता अपेक्षा नसून आपणाकडे जर रस्त्यांच्या कामासाठी पैसे नसतील तर आपण सुध्दा ऑफीसला का येत असतात ?, सदरील जळगाव शहरातील रस्त्यांची कामे ज्या संबंधित ठेकेदार / इंजिनिअर्स यांना दिलेले असले त्यांचा आमच्याशी प्रत्यक्ष संपर्क करुन द्यावा अथवा त्यांचा मोबाईल नंबर आम्हांस द्यावा म्हणजे आम्हा आता त्यांनाच याबाबत जाब विचारणार आहोत. तरी महोदय साहेब आपणास आता आमची हात जोडून नम्र विनंती की, जळगाव शहरातील संपूर्ण रस्त्यांच्या कामांना १० दिवसाचे आत सुरुवात करावी, असे यात म्हटले आहे.
