सातारा (वृत्तसंस्था) मोदी आणि शाह यांनी सतत मुंबईत येण्यापेक्षा मुंबईतच एखादा टू बीएचकेचा फ्लॅट घेऊन राहावे, असा टोला सुषमा अंधारे यांनी लगावला आहे. शिंदे गटाचे नेते आणि मंत्री शंभुराज देसाई यांच्या पाटण मतदारसंघात सुषमा अंधारे यांची सभा पार पडली. यावेळी त्यांनी चौफेर टीका केली.
सुषमा अंधारे (Sushma Andhare) यांनी सातारा येथे माध्यमांशी संवाद साधला. अंधारे म्हणाल्या, पंतप्रधान नरेंद्र मोदी (Narendra Modi) आणि अमित शाह (Amit Shah) यांनी उद्धव ठाकरे आणि शिवसेनेची धास्ती घेतली आहे. त्यामुळेच मोदी आणि शाह यांचे मुंबईतील दौरे वाढले आहेत. यामुळे भाजपकडून कंठघोष केला जात आहे.मात्र, मोदी आणि शाह यांनी सतत मुंबईत येण्यापेक्षा एखादा टू बीएचके फ्लॅट खरेदी करुन इथेच राहावं असा मिश्किल टोलाही सुषमा अंधारेंनी यावेळी लगावला आहे. उद्धव ठाकरे यांनी मुख्यमंत्री एकनाथ शिंदे यांना वाढदिवसाच्या शुभेच्छा द्यायला हव्या होत्या, अशी अपेक्षा शिंदे गटाचे आमदार संजय शिरसाठ यांनी व्यक्त केली होती. त्यावरही सुषमा अंधारे यांनी प्रतिक्रिया व्यक्त केली. उद्धव ठाकरे रोखठोक आहेत. 14 तारखेनंतर राज्यात मंत्रिमंडळ विस्तार होणार आहे. त्यात संधी मिळावी यासाठी संजय शिरसाठ असं विधान करत आहेत. आमच्या पोटात जे असते तेच ओठावर असते. संजू भाऊंनी उगाच रक्त आटवू नये, असा टोला त्यांनी लगावला.
