नवी दिल्ली (वृत्तसंस्था) देशभरात कोरोना बाधितांच्या संख्येत झपाट्यानं वाढ होत असल्याचं दिसून येत आहे. देशभरात कोरोना बाधितांचा आकडा पहिल्यांदाच नव्या कोरोना बाधितांचा आकडा एक लाखांवर पोहोचला आहे. गेल्या २४ तासांत देशात १ लाख ३ हजार ५८८ नवे कोरोनाबाधित रुग्ण आढळले आहेत. त्यामुळे देशातील रुग्णांची एकूण संख्या १ कोटी २५ लाख ८९ हजार ६७ इतकी झाली आहे.
केंद्रीय आरोग्य मंत्रालयाच्या ताज्या आकडेवारीनुसार, देशातील एकूण कोरोना रुग्णांची संख्या वाढून आता १ कोटी २५ लाख ८९ हजार ६७ इतकी झाली आहे. देशात सक्रीय रुग्णांची संख्याही वाढत असून ती आता ७ लाख ४१ हजार ८३० इतकी झाली आहे. रविवारी ५२,८४७ रुग्ण कोरोनातून बरे झाले आहेत. तर एकूण बऱ्या झालेल्या रुग्णांची संख्या आता एक कोटी १६ लाख ८२ हजार १३६ इतकी झाली आहे. देशात आतापर्यंत एक लाख ६५ हजार लोकांचा कोरोनामुळे मृत्यू झाला आहे.
देशातील सर्वाधिक कोरोनाचा प्रादुर्भाव असणाऱ्या राज्यांच्या यादीत महाराष्ट्राचाही समावेश आहे. राज्यात अनेक कठोर निर्बंध लागू करण्यात आले आहेत. काल (सोमवारी) महाराष्ट्रात ४७ हजार २८८ नव्या कोरोना बाधितांची नोंद झाली आहे. तर १५५ रुग्णांचा कोरोनामुळे मृत्यू झाला आहे. आतापर्यंत महाराष्ट्रात एकूण ३० लाख ५७ हजार ८८५ कोरोना बाधितांची नोंद झाली आहे. तर एकूण ५६ हजार ३३ रुग्णांचा मृत्यू झाला आहे. यावेळी राज्यात ४ लाख ५१ हजार ३७५ रुग्णांवर उपचार सुरु आहेत. तसेच राज्यात रविवारी एका दिवसांत ५७ हजार ७४ रुग्णांची नोंद करण्यात आली होती. ही राज्यातील आतापर्यंतची सर्वाधिक वाढ होती. तर २२२ रुग्णांचा कोरोना महामारीमुळे मृत्यू झाला होता.
