मुक्ताईनगर (प्रतिनिधी) जेवणात पापड दिला नाही म्हणून मद्यधुंद तरुणाने चक्क जन्मदात्या आईला आणि सख्ख्या भावाला मारहाण केल्याचा धक्कादायक प्रकार तालुक्यातील कुऱ्हा येथे घडला आहे. दरम्यान, संशयित आरोपी मुलगा शुभम मोरे (वय २३ रा. वार्ड नं २, कुऱ्हा ता. मुक्ताईनगर) याच्याविरुद्ध गुन्हा दाखल करण्यात आला असून शुभमला पोलिसांनी अटक केली आहे.
यासंदर्भात राहुल सुपडा मोरे (वय २१, रा. वार्ड नं २, कुऱ्हा ता. मुक्ताईनगर) यांनी दिलेल्या फिर्यादीनुसार, दि. ५ एप्रिल २०२२ रोजी शुभम सुपडा मोरे (वय २३ रा. वार्ड नं २, कुऱ्हा ता. मुक्ताईनगर) याने दारुच्या नशेत घरी येवून जेवण करीत असतांना पापड मागितला. आईने पापड नाही असे म्हणताच त्याने आईला चापटा बुक्क्यांनी मारहाण केली. वडील व भाऊ राहुल बोलण्यास गेले असता शुभमने राहुलला पाण्याने भरलेला तांब्या डोक्यात मारुन फेकल्याने दुखापत केली. तसेच चापटाबुक्यांनी मारहाण करुन शिवीगाळ देखील केली. एवढेच नव्हे तर, शुभमने राहुलच्या पाठीमागे डाव्या बाजुने जोरात चावा घेवून दुखापतही केली. याप्रकरणी मुक्ताईनगर पोलीस ठाण्यात शुभम मोरे याच्याविरुद्ध गुन्हा दाखल करण्यात आला असून त्याला अटक करण्यात आली आहे. पुढील तपास पोलीस निरीक्षक शंकर शेळके यांच्या मार्गदर्शनाखाली पो.ना. हरिश गवळी हे करीत आहेत.