पंढरपूर : मोहोळ (Mohol) तालुक्यात पेनुर येथील एका महिलेने आपल्या ७ महिने आणि ३ वर्षाच्या चिमुकल्याला विष पाजत आत्महत्या केली आहे. या घटनेत ७ महिन्याच्या चिमुकलीसह संबधित महिलेचाही मृत्यू झाला आहे. तर ३ वर्षाच्या चिमुरड्यावर रुग्णालयात उपचार सुरू आहे. प्रियंका सूरज चौरे आणि सुप्रिया सूरज चौरे असं मृत्युमुखी पडलेल्या मायलेकींचं नाव आहे.
मिळालेल्या माहितीनुसार, मोहोळ तालुक्यातील पेनुर येथील राहणाऱ्या प्रियंका चौरे नामक महिलेनं ७ महिन्यांची चिमुकली सुप्रिया चौरे आणि ३ वर्षाच्या चिमुरडा शंभुराजे या दोन्ही पोटच्या लेकरांना सुरूवातीला विष पाजलं त्यानंतर प्रियंका यांनीही विष प्राशन केले. या घटनेत प्रियंका आणि सुप्रियाचा मृत्यू झाला. तर सूरज याच्यावर रुग्णालयात उपचार सुरू आहे. दरम्यान, महिलेने इतकं टोकाचं पाऊल का उचललं याबाबत अद्यापही माहिती मिळालेली नाही. या घटनेनंतर पंढपूर शहर पोलीस ठाण्यात नोंद करण्यात आली असून पोलिसांनी सदरील घटनेचा तपास सुरू केला आहे.
