जळगाव (प्रतिनिधी) पतीच निधन झाल्यानंतर आईने आयुष्यभर केलेल्या कष्टाचं मुलाने पहिल्याच प्रयत्नात पीएसआय होत चीज केलं आहे. धरणगाव तालुक्यातील चांदसर येथील शुभम साहेबराव शिंदे या तरुणाने अवघ्या २५ व्या वर्षीच महाराष्ट्र लोकसेवा आयोगाची परीक्षा उत्तीर्ण होत पोलीस उपनिरीक्षक पदाला गवसणी घातली आहे.
धरणगाव तालुक्यातील चांदसर या छोट्याश्या गावातील शुभम साहेबराव शिंदे हा रहिवासी आहे. आई , एक बहिण शुभम याचा परिवार. बहिण मोठी तर शुभम हा लहान आहे. शुभमचे वडील हे खाजगी वायरमन होते. दहावीत शिकत असतांना , बोर्डाची परिक्षा सुरु असतांना शुभम याच्या वडीलांच निधन झालं होतं, आणि खेळण्याच्या वयात शुभमचं पितृछत्र हरपलं, तसेच घरातील कर्ता पुरूष गेल्याने कुटुंबावर दुखा:चा डोंगर कोसळला. वडीलांच्या निधनानंतर दोन मुलांची आणि कुटुंबाची सर्व जबाबदारी ही शुभमच्या आई सरला शिंदे यांच्यावर खांद्यावर येवून पडली.
यानंतर दोन्ही मुलांसाठी सरला शिंदे यांनी पदर खोचला आणि त्या घराबाहेर पडल्या. सरला शिंदे यांच्याकडे घरची सहा एकर शेती आहे. ही शेती करण्याबरोबरच मुलांच्या शिक्षणात कुठेही कमी पडू नये म्हणून सरला शिंदे ह्या दुसऱ्यांच्या शेतात सुध्दा मजूर म्हणून कामाला जावू लागल्या. आपल्या शेतातील कामे संपली की त्या इतरांच्या शेतात मजुरीसाठी जायच्या. अशा पध्दतीने सरला शिंदे यांनी मुलगा शुभम आणि मुलगी अशा दोघांचे शिक्षण पूर्ण केलं.
पुढं पत्र्याचं आणि मागे मातींच …अशा घरात शुभम हा वाढला. सरला शिंदे ह्या कुठेही शुभमच्या शिक्षणात कमी पडल्या नाहीत. शुभम याने दहावीपर्यंत शिक्षण गावातचं पूर्ण केलं, त्यानंतर बारावी तसेच पुढील शिक्षण त्याने जळगावातील नूतन मराठा महाविद्यालयात पूर्ण केलं. शुभम याने केमिस्ट्री या विषयात पदवी घेतली, आणि त्यानंतर ऑरग्यानिक केमस्ट्रिी या विषयात पदवीत्तुर पदवी सुध्दा घेतली. त्यानंतर काही काळासाठी एका खाजगी कंपनीत सुध्दा शुभमने काम केलं. पदवीला शिकत असतांना शुभम हा खाजगी क्लासच्या सेमीनार साठी गेला होता. यादरम्यान याठिकाणी महाराष्ट्र लोकसेवा आयोगाच्या, तसेच केंद्रीय लोकसेवा आयोगाच्या उत्तीर्ण विद्यार्थ्यांचा त्यांच्या आई वडीलासोबत सत्कार करण्यात आला. मुलाबरोबरच आई वडीलांचा सत्कार होतोय, हे पाहून याचठिकाणी शुभम याने अधिकारी होण्यांची मनाशी खूनगाठ बांधली. शुभम याला सुरुवातीपासून पोलीस खात्यांच विशेष आकर्षण होतं, त्यामुळे महाराष्ट्र लोकसेवा आयोगाची परीक्षा देवून पोलीस उपनिरिक्षक होण्याचा शुभमने निर्णय घेतला.
मित्रांच्या माध्यमातून पदवीचं शिक्षण घेत असतांनाच शुभम याने महाराष्ट्र लोकसेवा आयोगाच्या परीक्षेची माहिती घेतली होती, त्यानंतर त्याने युट्युब याबरोबरच सोशल मिडीयाच्या माध्यमातून परीक्षेच्या तयारीबाबतची माहिती घेतली, अधिकारी झालेल्या तरुणांचे व्हिडीओ त्यांच्या मुलाखती बघितल्या, अशा अनेकांच्या मुलाखतीतून त्यांनी वाचलेल्या पुस्तकाची यादी शुभमला मिळाली, अशा पध्दतीने अनेक मुलाखती पाहून प्रत्येकाचा संदर्भ घेत शुभमने अभ्यासासासाठी निवडक अशा स्वत:ची पुस्तकाची लिस्ट तयार केली. खाजगी क्लास लावण्यासारखी कुटुंबाची परिस्थिती नव्हती, त्यामुळे घरच्या घरीच शुभम अभ्यास करायला लागला. वडीलानंतर आईचे जबाबदारी स्विकारली, अन् कष्ट केले, तिचे कष्ट शुभम त्याच्या डोळ्यांनी पाहत होता, हे कष्ट पाहूनच शुभमला मोठी उर्जा मिळायची. अशा पध्दतीने शुभमने कठोर परीश्रम आणि प्रचंड जिद्दीने अभ्यास केला.
सप्टेंबर २०२१ मध्ये पहिल्यांदाच शुभमने महाराष्ट्र लोकसेवा आयोगाची पूर्वपरीक्षा दिली आणि पहिल्याच प्रयत्नात शुभम हा परीक्षा उत्तीर्ण झाला. त्यानंतर मुख्य परीक्षेसाठी शुभमने जळगावला अभ्यासिका लावली. अभ्यासात कुठेही कमी पडू नये म्हणून महाराष्ट्र लोकसेवा आयोगाची परीक्षा उत्तीर्ण झालेल्या विद्यार्थ्यांचे संपर्क क्रमांक मिळवत, शुभमने त्यांचे सुध्दा मार्गदर्शन घेतले. अशा पध्दतीने दिवसरात्र अभ्यास करुन २०२२ मध्ये झालेली मुख्य परीक्षा उत्तीर्ण होत शुभमने त्याच्या पहिल्याच प्रयत्नात यशाला गसवणी घातली व अवघ्या २५ व्या वर्षीच अधिकारी म्हणून अंगावर वर्दी चढविली. महाराष्ट्र लोकसेवा आयोगाची परीक्षा देवून शुभम हा गावातला पहिलाच अधिकारी झाला आहे. त्यामुळे शुभमचा त्याच्या गावकऱ्यांना मोठा अभिमान आहे. शुभमच्या माध्यमातून गावातला पहिलाच अधिकारी झाल्याच्या आनंदात संपूर्ण गावकऱ्यांनी शुभमची वाजत गाजत मिरवणूक काढली. आणि मोठा आनंद व्यक्‍त केला.
