जळगाव (प्रतिनिधी) भारतीय रेल्वेच्या जनरल मॅनेजर मुंबई कार्यालयाच्यावतीने पश्चिम रेल्वे विभागातील समस्यांच्या निराकरणासाठी आज ऑनलाईन बैठकीचे आयोजन करण्यात आले होते. या विभागातील संबंधित सर्व खासदारांसह खासदार उन्मेश पाटील यांनी देखील या बैठकीत सहभाग घेत अमळनेर रेल्वे प्लॅटफॉर्म समांतर करणे, टाकरखेडा चांदणी कु-हा गेट जवळील मंदिरासाठी व चौबारी आर. यू . बी आदी समस्या तातडीने सोडवा याकडे लक्ष वेधले.
आज सकाळी अकरा वाजता ही बैठक सूरू झाली. यावेळी खासदार उन्मेश पाटील यांनी जळगाव, पाळधी, चावलखेडा, धरणगाव, भोणे, अमळनेर, बेटावद आदी रेल्वे स्टेशनवर सोयी सुविधा करण्यात यावे, अमळनेर येथील प्लॅटफॉर्म क्रमांक एक व दोन हे परस्परांना समांतर नसल्याने प्रवाशांचे हाल होतात. याच प्रमाणे खानदेश एक्सप्रेस पूर्ववत करण्यात यावी, नवजीवन एक्सप्रेस धरणगाव रेल्वे स्टेशनवर हॉल्ट देण्यात यावा. टाकरखेडा चांदणी कु-हा गेट जवळील मंदिरासाठी नविन आर. यू. बी. व चौबारी रेल्वे गेट १३० व १३१ मध्ये आर. यू. बी. तयार करण्यात यावा आदी समस्यांकडे लक्ष वेधले. तसेच पत्रव्यवहाराद्वारे वेळोवेळी आपल्याकडे मांडलेल्या समस्या सोडविण्यासाठी संबंधितांना आदेश द्यावेत अशी मागणी केली.
