मुंबई (वृत्तसंस्था) मुंबईचे माजी पोलीस आयुक्त परमबीर सिंह चांदीवाल आयोगासमोर हजर झालेत. चांदीवाल आयोगासमोर जाताना मुंबईचे माजी पोलीस आयुक्त परमबीर सिंह आणि सचिन वाझे एकमेकांसमोर आले. त्यावेळी दोघांमध्ये तासभर चर्चा झाली. दरम्यान, या बैठकीची चौकशी मुंबई पोलिसांकडून होणार आहे. दोघे कोणाच्या परवानगीने भेटले याचा पोलीस तपास करणार आहेत.
सचिन वाझे आणि परमबीर सिंह यांनी केबिनमध्ये बसून सुमारे तासभर चर्चा केल्याचे वृत्त समोर आले. यानंतर आता मुंबई पोलीस या भेटीचा तपास करणार आहेत. या भेटीसंदर्भात माहिती घेण्यासाठी मुंबई पोलिसांचे पथक चांदीवाल आयोगाच्या इमारतीत पोहोचले. अशा प्रकारे दोघांना भेटण्याची परवानगी कुणी दिली आणि त्या भेटीत नेमकं काय झालं, याचा तपास पोलिस करत आहेत.
मुंबई पोलिसांच्या तपासादरम्यान सचिन वाझेला कारागृहातून आयोगासमोर आणणाऱ्या पथकाचीही चौकशी होऊ शकते. आज परमबीर सिंह यांना चांदीवाला आयोगाने समन्स बजावले होते आणि याच दरम्यान सचिन वाझेलाही बोलावण्यात आले होते. दरम्यान, वाझे आणि परमबीर सिंग यांना भेटण्याची परवानगी आयोगाकडून मिळाल्याचा दावा सचिन वाझेच्या वकिलाने केला आहे.
