नाशिक (वृत्तसंस्था) अनैतिक संबंधात अडसर नको म्हणून आपल्या पहिल्या पतीपासून जन्मलेल्या मुलाचे एक-दोन नव्हे तर सात वर्ष सांभाळ करत वाढविलेल्या चिमुकल्याचा सख्ख्या आईनेच प्रियकराच्या मदतीने खून केल्याची हृदयद्रावक घटना घडली आहे. या खून प्रकरणातील मुख्य संशयित सोमनाथ वसंत कुऱ्हाडे आणि त्याची प्रेयसी सुलोचना घनश्याम जाधव या दोघांना आडगाव पोलिसांनी अटक केली आहे.
संशयित आणि त्याची प्रेयसी यांचे अनेक दिवसांपासून अनैतिक संबंध होते. मात्र सुलोचना हिच्या पहिल्या नवऱ्यापासून झालेल्या मुलाचा सांभाळ तीच करत होती. उपचारादरम्यान या मुलाचा मृत्यू झाला. आडगाव पोलीस ठाण्याचे वरिष्ठ पोलीस निरीक्षक इरफान शेख यांनी या प्रकरणाचा कोणताही पुरावा शिल्लक नसतांना या खुनाचा छडा लावला आहे.
नऊ महिने आपल्या पोटात वाढविणाऱ्या बाळाला जन्म देत तब्बल सात वर्षे सांभाळ करणारी आईच त्याच्या मृत्यूला कारणीभूत ठरली. पहिल्या पतीपासून वेगळे झाल्यावर प्रियकरासोबत राहत असताना अनैतिक संबंधांमध्ये पोटच्या मुलाची बाधा येऊ लागल्याचे समजून प्रियकराच्या मदतीने त्या चिमुकल्याचा खून केल्याचा सहभाग असल्याने मातृत्वाच्या नात्याला काळिमा फासणारी घटना घडल्याने हळहळ व्यक्त केली जात आहे.
