नवी दिल्ली (वृत्तसंस्था) गुजरातमध्ये या वर्षाच्या अखेरीस होणाऱ्या विधानसभा निवडणुकांपूर्वी काँग्रेस पक्षातील नाराजी चव्हाट्यावर येऊ लागली आहे. पाटीदार समाजाचे नेते आणि प्रदेश काँग्रेसचे कार्याध्यक्ष हार्दिक पटेल (Hardik Patel) यांनी आपल्याच पक्षावर निशाणा साधत घरचा आहेर दिला आहे. गुजरात काँग्रेसमध्ये माझी अवस्था नसबंदी केलेल्या नवऱ्यासारखी झाली असल्याचा ते म्हणाले.
हार्दिक म्हणाले की गुजरात काँग्रेसमध्ये माझी अवस्था नसबंदी केलेल्या नवऱ्यासारखी झाली आहे. हार्दिक पटेल यांनी मेहसाणा हिंसाचार प्रकरणी दोषी ठरवण्याच्या उच्च न्यायालयाच्या आदेशाला सर्वोच्च न्यायालयाने स्थगिती दिली असतानाच त्यांनी ही टिप्पणी केली आहे. यानंतर हार्दिक यांनी आगामी विधानसभा निवडणूक लढवण्याचे संकेत दिले आहेत.
2015 मध्ये, हार्दिक पटेल यांनी गुजरातमधील पाटीदार समाजाचे नेतृत्व केले, इतर मागासवर्गीय (OBC) श्रेणी अंतर्गत आरक्षणाची मागणी केली. एका वृत्तसंस्थेच्या वृत्तानुसार, हार्दिक पटेल म्हणाले की, मला पीसीसीच्या (राज्य काँग्रेस कमिटी) कोणत्याही बैठकीला आमंत्रित करण्यात आलेले नाही. कोणताही निर्णय घेण्यापूर्वी ते माझा सल्ला घेत नाहीत. मग या पदाला अर्थ काय?
हार्दिक पटेल यांच्या नाराजीचे कारण काय?
हार्दिक पटेल यांनी काँग्रेसमधील निर्णयक्षमतेवरही प्रश्नचिन्ह उपस्थित केले असून पाटीदार नेते नरेश पटेल यांना काँग्रेसमध्ये सामील करण्यात दिरंगाई केल्याबद्दल प्रश्नचिन्ह उपस्थित केले आहे. ते म्हणाले की, काँग्रेस नेत्यांची वक्तव्ये दररोज मीडियामध्ये येतात, त्यामुळे संपूर्ण पाटीदार समाजाचा अपमान होत आहे. दोन महिने झाले, पण आजपर्यंत नरेश पटेल यांचा पक्षात समावेश करण्याबाबत निर्णय का झाला नाही? काँग्रेस हायकमांड आणि स्थानिक नेतृत्वाने याबाबत तातडीने निर्णय घ्यावा.
