नशिराबाद (सुनिल महाजन) येथील न्यू इंग्लिश स्कूल प्राथमिक विद्यामंदिरात नुकतीच पालक शिक्षक सभा राणी लक्ष्मीबाई नूतन सभागृहाच्या वास्तूत घेण्यात आली. सभेला नशिराबाद शिक्षण मंडळाचे अध्यक्ष जनार्दन शामराव माळी, कार्याध्यक्ष योगेश पाटील ,संचालक गोविंदा भोळे, विनायक वाणी तसेच माध्यमिक विभागाचे मुख्याध्यापक सी. बी. अहिरे व जे. वाय. महाजन सर प्राथमिक विभागाचे मुख्याध्यापक प्रवीण महाजन उपस्थित होते.
सभेच्या प्रारंभी सरस्वती पूजन व दिपप्रज्वलन करण्यात येऊन लोकमान्य टिळकांच्या जयंती निमित्त प्रतिमापूजन व माल्यारपण करण्यात आले. प्राथमिक विभागाचे मुख्याध्यापक प्रवीण महाजन यांनी सभेचे प्रास्ताविक केले.त्यांनी पालक शिक्षक संघाची आवश्यकता विशद करून पालक व शिक्षक यांनी आपल्या पाल्याच्या शैक्षणिक प्रगतीबरोबरच सुसंस्कार करण्याची गरज असल्याचे सांगितले .शिक्षक तुषार रंधे यांनी पालक शिक्षक संघाचे वैशिष्टे व कार्य सांगितले. तर उपशिक्षिका सुनीता न्हावी यांनी पालक शब्दाचा अर्थ सांगून पालकांची भूमिका काय असावी याबाबत मार्गदर्शन केले. माध्यमिक विभागाचे मुख्याध्यापक सी बी अहिरे यांनी पाल्याच्या उज्वल भवितव्यासाठी संस्थेचे संचालक मंडळ प्रयत्नशील असून शाळेमध्ये सुरू असलेल्या व भविष्यात राबविण्यात येणाऱ्या उपक्रमाविषयी त्यांनी माहिती दिली .संस्थेचे संचालक विनायक वाणी यांनी शालेय शिक्षणाबरोबरच मुला मुलींसाठी बाल संस्काराची गरज असल्याचे सांगून पालकांनी आपल्या पाल्यास झिपरू अण्णा महाराज बालसंस्कार केंद्रात पाठवावे, जेणेकरून आपला पाल्य उत्तम सुसंस्कारित होऊन त्याची शैक्षणिक प्रगती चांगली होऊ शकेल.
यावेळी पालकांनी देखील शाळेच्या भौतिक सुविधा तसेच शैक्षणिक प्रगतीसाठी सुरू असलेले विशेष उपक्रम याविषयीचे गौरवोद्गार काढले. संस्थेने विद्यार्थ्यांच्या शैक्षणिक प्रगती व गुणवत्ता विकासासाठी प्रोजेक्टर आणि ई लर्निंगची सुविधा केली असल्याचे प्रात्यक्षिकातून व चित्रफितीतून दाखवून दिले .तसेच पालकांच्या विविध शंकांचे निरसन संस्थेचे कार्याध्यक्ष योगेश जी पाटील व उपस्थित संचालक मंडळांने केले. आपल्या अध्यक्षीय भाषणात संस्थाध्यक्ष जनार्दन माळी यांनी संस्थेच्या संचालक मंडळावर गुणवत्ता वाढीसाठी जशी जबाबदारी आहे तशी पालकांची देखील आपल्या पाल्याच्या शैक्षणिक प्रगती व गुणवत्ता वाढीसाठी जबाबदारी मोठी असल्याचे प्रतिपादन केले. शेवटी पालक शिक्षक संघाची कार्यकारणी निवडण्यात येवून नूतन पालक पदाधिकाऱ्यांचा सत्कार करण्यात आला.कार्यकारिणी याप्रमाणे उपाध्यक्ष यशवंत माळी, सचिव वंदना पाटील, वैष्णवी भट. सहसचिव निलिमा रोटे, विद्यार्थी प्रतिनिधी ऋषी पाटील व डिंपल रोटे. या कार्यक्रमाचे सूत्रसंचालन शिल्पा पाठक व नेहा चौधरी यांनी केले. तर आभार प्रदर्शन शितल चावरे यांनी केले. सभेच्या यशस्वीतेसाठी प्राथमिक विभागातील सर्व शिक्षक व शिक्षकेतर कर्मचारी वृंदांचे सहकार्य लाभले.
